宋熙年陀B唔敢出街

陳智燊（Jason）與宋熙年（Sarah）日前宣布懷第二胎，兩公婆昨日在YouTube上載新片，分享Sarah在疫情下的陀B心情。二人以圖畫表示懷孕時，Jason巨細無遺解釋，Sarah取笑說︰「連子宮位置都講埋，老公畫公仔唔使畫出腸！」雖有生育經驗，但今胎遇上疫情，令他們不禁非常緊張。

Sarah說︰「呢兩個半月，我只出過兩至三次街，盡量將風險減到零，屋企人分別喺澳洲同倫敦生活，都好緊張佢哋狀況。」她笑言幸好有老公全力陪大仔Damon︰「老公每朝八點幾起身陪大仔，我懷孕比較攰，就瞓到11點。」她笑指Jason有潔癖，每次外出回家，都消毒身上所有物品，令她相當安心。