好多藝人都會同佢哋嘅粉絲喺Intagram嘅限時動態互動，日前陳嘉寶就喺限時動態同粉絲傾偈：「Let's HV a talk！Shall We？」不過一直有問必答嘅陳嘉寶，期間被某位粉絲辣㷫，因為該位粉絲用質疑嘅態度問佢：「點解好似唔見你要湊小朋友咁？你其他reply（回覆）都話喺屋企睇書etc.None is about（全不關於）湊小朋友。」
(圖片：陳嘉寶IG)
陳嘉寶回應時似乎都有少少怒火：「這年頭做女人好難…不提先生是不顧家，不提父母是外嫁女，不提小孩是不負責任，不提工作是靠人養。」佢更反問對方：「請問有沒有看到我寫照顧家人？我好像有寫呀。」、「我知道很多人會喜歡上網分享自己小孩的事，就好像很多人喜歡分享自己每天吃了甚麼......也不是第一個人這樣問了，語氣就好像是在指摘你根本沒有責任，根本就是只顧自己的人。其實我也已經說過了，小朋友的事我是真的不會分享。」
囡囡極少曝光，似足媽媽眼大大！(圖片：陳嘉寶老公IG)
陳嘉寶表示佢係尊重小朋友嘅私隱，佢冇權幫小朋友決定；佢又話自己唔係育兒專家，育兒資訊佢都唔會亂分享。
(圖片：陳嘉寶老公IG)
陳嘉寶話呢個IG係佢個人平台，佢有權選擇分享內容，唔會為咗人哋嘅說話改變佢做法：「如果是一開始就有答案我是你心目中那種不負責任、自私不管小孩的人，其實，我說再多也沒用，我也不會做任何事去破壞自己保護家人的想法。」
好友賴慰玲(右)就相反，經常Share囝囝成長點滴。(圖片：陳嘉寶IG)
佢表示就算成日分享小朋友嘅相亦唔代表一個家長好盡責，更加話佢做咗幾多嘢、付出咗幾多，自己、囡囡同埋家人心入面知道已經足夠咁話。
陳嘉寶喺《女人俱樂部》飾演少女版李若彤。(網上圖片)
雖然唔少星級媽咪都會Happy Share自己BB嘅可愛生活點滴，不過既然陳嘉寶選擇唔畀小朋友曝光，大家都係收起好奇心，默默祝福BB健康成長啦！
撰文：黃蘊姿