最近TVB播緊《機場特警》，唔難發現裡面有唔少熟悉嘅角色設定、劇情，好似有固定模式咁。以下將會總括10個警匪片嘅特色，睇吓你有冇共鳴！
1. 每個部門有固定地區
呢啲名讀起上嚟好順口，因為咁多年好多套劇都係咁講，例如：新界南/北交通部；慈雲山消防局；西九龍重案組。有網民就話西九有油尖旺、深水埗治安複雜，所以好正常，不過有從事警隊嘅網民話成日都被外人誤會喺西九龍返工。
(TVB電視截圖)
(TVB電視截圖)
2. 宣萱係人質
有宣萱嘅劇集就會有綁架發生，佢喺18年內所演的角色共被脅持22次，連同電影同新加坡劇合共被脅持24次，分別有刀、槍又或者被人綁喺海中央同半天吊等等，堪稱人質王，但好彩次次都平安冇事，有網友就笑言叫TVB開番套叫「宣萱綁架血淚史」。
(TVB電視截圖)
3. 有人衝動累事
吳卓羲由古代捕快做到現代警隊，喺17年間做過13個階層，包括學警、散仔、藍帽子、CID、飛虎隊同埋其他特種部隊，甚至連臥底都演過，可惜佢幾乎每次都因為衝動頂撞上級，期間被女角阻止叫佢冷靜，事後搞到行動差啲或者直接失敗，最後後悔，死死氣道歉。而喺《機場特警》中，張振朗就擔任咗呢個「重任」。
(TVB電視截圖)
4. 一定有人變節
黑社會都會有臥底，警隊入邊都會有黑警，好似《使徒行者》系列咁。
(TVB電視截圖)
5.黑社會得嗰幾個名
唔係阿坤，就係阿標、阿喪，好似「御用黑社會」鄭家生喺《人間蒸發》飾演Kill標、《同事三分親》飾演大喪哥、《法證先鋒II》飾演喪狗、《潛行狙擊》飾演雷彪、《鐵探》飾演羅彪咁。
(TVB電視截圖)
6. 手槍傷人最強
好多主角用左輪手槍可以好似衝鋒槍咁連射，子彈打極都仲有，而且威力仲遠高於狙擊步槍、霰彈槍、衝鋒槍等。
(TVB電視截圖)
7. 外國人實做警司以上級別
例如河國榮、布偉傑，就成日做警隊比較高級嘅職位，好有威嚴。
(TVB電視截圖)
8. 綁架人只會用七人車
好似《好心作怪》裡面賈曉晨就上咗架黑色七人車，有網民分析後覺得七人車車廂位置大啲，可以坐到多啲綁匪，最重要係車門拉一拉就打開，方便捉人入車咁話。
(TVB電視截圖)
9. 警察唔鍾意人教佢做嘢
「阿sir做嘢唔使你教」呢句係咪耳熟能詳？因為大部分劇集當講到警察盤問疑犯，又被疑犯質問嗰陣就會咁答。除此之外仲會講：「我警告你，咪同我玩嘢啊！」、「阿Sir同你講緊嘢啊！」等。
(TVB電視截圖)
10. 兇手喺身邊
重大案件或者連環兇手肯定係經常出現嘅配角，一旦出現新配角，件案就好有可能同佢有關，如《十二傳說》丘梓軒飾演嘅吳精神咁，佢埋伏咗好耐！
(TVB電視截圖)
撰文：張芷晴
責任編輯：楊安莉