【聲明】港生活網站並無進行電話推廣活動

連累湯洛雯被Unfollow? 楊明:如果係我請佢食飯

發佈時間: 2020/04/09

楊明、蔡思貝及張振朗等一班《機場特警》演員,昨日為《流行經典50年》任嘉賓,日前湯洛雯(靚湯)在IG分享《機場特警》NG片時,有不滿楊明的網民揚言要因此取消追蹤靚湯,楊明昨日坦言不能控制網民想法,若真的連累靚湯,會請食飯賠罪。

楊明昨日孖劇中女友何依婷齊齊錄影節目,在《機場特警》演空姐的湯洛雯積極宣傳,日前在IG貼出劇集片段,誰知不少杯葛楊明的網民留言畀負評,更表示若靚湯再分享劇集相關資訊,便會取消追蹤她。楊明聞言說:「係咩?可能唔係因為有我做呢?呢排有好多唔同嘅正面、負面評論,呢啲我控制唔到,就唔使太在意。」

問楊明可覺得自己連累靚湯?他說:「如果連累到佢,我咪請佢食飯囉!不過可能因為咁,或者吸納好多新嘅fans呢?近期社會有好多聲音,唔好因為一撮人嘅言論而太在意。」另外,楊明與劇中兄弟在節目中跳唱《伴我啟航》,他特意花三小時練舞,又講笑說:「我哋個個跳舞都OK,最渣係後面一班dancers。其實dancers好專業,我睇完佢哋跳舞,就同自己講,都係返去做戲算啦!」

蔡思貝驚影衰張振朗

同場的張振朗與蔡思貝合唱楊千嬅歌曲《小飛俠》,第一次公開獻聲的思貝坦言心情緊張,擔心表現不好,會「影衰」新秀出身的張振朗。問思貝有否請教緋聞男友胡鴻鈞?她說:「我都係靠自己練習,等聲帶習慣唱歌。我應該唔會走音,我唔係五音不全,只係唔識開聲同埋唔夠氣。」她表示同事對他們的歌聲評價不錯,所以考慮組成「思朗」組合獻唱。

採訪︰Pauline

攝影︰林良明

編輯:李潔盈

美術:梁政敏

連累湯洛雯被Unfollow? 楊明:如果係我請佢食飯

湯洛雯的靚空姐造型備受讚賞。

連累湯洛雯被Unfollow? 楊明:如果係我請佢食飯

張振朗與蔡思貝趁拍劇空檔狂練歌。