黃佩霞(Almen)為90年代一線名模，天生充滿女人味同性感氣息嘅佢更曾經拍過《豹妹》等電影，備受力捧。不過事業如日中天嘅佢發現自己懷孕，但偏偏佢同當時嘅男友瀕臨分手邊緣，最終佢毅然決定獨力湊大阿女Camelot。
(網上圖片)
(網上圖片)
Almen曾經為咗想畀阿女有完整嘅家而努力修補同前男友嘅關係，但最後並不成功。Almen認為成年人之間的男女關係唔應該牽涉到小朋友身上。最後決定將關係分開處理：兩個成年人嘅關係以及父女、母女之間嘅關係。
(黃佩霞IG)
Almen指阿女出世之後，佢凡事都以阿女嘅利益作為首要考慮條件，阿女幾歲嘅時候佢會選擇朝早時候陪佢，自己就返夜班。到阿女十幾歲嘅時候，佢就會減少晚間應酬，留更多時間畀家人。即使去旅行都係以小朋友意願行先，自己喜好都拋諸腦後。 Almen話自己後生時已經享受過自由嘅生活，所以冇太大問題，更相信等兒女長大之後，又可以再過自己嘅生活。
(黃佩霞IG)
Almen嘅模特兒同演員工作時間同收入都唔太穩定，又要經常出埠。阿女一歲前佢已經出埠超過7次，阿女唔認得自己都令Almen覺得好心痛。作為一個單親媽媽，佢決定轉一份穩定的工作。
(黃佩霞IG)
自小就鍾意做運動嘅Almen對health & fitness類嘅生意都好感興趣，所以佢就同朋友合伙做瑜伽生意。佢哋由7個人嘅公司開始，發展成有過1,000名員工嘅企業，非常成功。
(黃佩霞IG)
Almen指瑜伽背後有一種概念。鍛鍊瑜伽嘅人, 大部分都充滿正能量, 而且唔輕易認輸，參加者需要堅定的意志和願意為達成目標付出的心態。或者就係呢種積極嘅心態，令到Almen咁堅強單親湊大阿女。
(黃佩霞IG)
佢嘅自我紀律更令佢Keep住廿年如一日嘅Model身形，真係少啲毅力都唔掂。
Almen與老公Ryan經常一齊出席公開活動。(黃佩霞IG)
事業得意，Almen後來亦覓得真愛，2005年Almen與美藉老公Ryan結婚，至今一直keep住甜蜜。 Ryan同Almen都有相同經歷，係帶子洪郎，經歷過一次失敗婚姻。
Zanska好靚仔，有啲似阮馬素。(黃佩霞IG)
婚後又與繼仔Zanska及囡囡Camelot組成四口之家，Almen一直都視Zanska如己出，感情深厚，實在難得！
(黃佩霞IG)
撰文：黃蘊姿
責任編輯：楊安莉