現年42歲的田蕊妮，1993年參加歌唱比賽加入亞視，拍過幾部電視劇後於2003年離開，星途一直載浮載沉。
(亞視劇集《萬家燈火》劇照)
直到2007年加入無綫，劇接劇嘅佢演技獲得觀眾肯定開始走紅，更用咗6年時間就成為雙料視后。
(東星娛樂)
效力無綫12年間阿田拍落無數高收視劇集，但天下無不散之筵席，上年田蕊妮宣布唔同無綫續約向外闖，而今日就係阿田正式完約無綫嘅日子，佢喺自己社交網站好感慨咁打咗一大段文字答謝粉絲：「我不打算在這裏公開感謝誰，因為在私底下已感謝了他們，我反而想公開感謝每一位觀眾，謝謝你們這些年來對本人的支持與鼓勵。在這過去的十二年間，為大家演出了無數的角色，甚麼視后的銜頭、甚麼獎項，都不及你們的愛戴！」
(東星娛樂)
毅然離巢，但佢對跟住落嚟點發展就暫時未有打算：「近年香港所發生的種種事情和這次全球的疫情，我深深體會到計劃追不上變化這回事！世界彷彿停頓，倒不如趁這個時候好好想想自己真正需要的是甚麼？真正喜歡的又是甚麼？」
(田蕊妮IG)
電視界似乎已經「摸頂」嘅佢表示仍然想不斷接受新挑戰：「比起舒適圈，我更加有興趣去探索那些未知的可能性，接受挑戰，從中發掘更多潛能。舒適圈，有時候只是一緊箍咒。 很多人現在都在思索當疫情過後想做些甚麼，我也很期待踏出家門為大家演出的那一天呢！」
(《鬼同你OT》截圖)
喺阿田未有新搞作之前，睇嚟大家都只能夠回味佢嘅舊作。阿田近年最經典之作莫過於喺《鬼同你OT》入面同飾演女鬼嘅胡定欣「人鬼神同步」。胡定欣同阿田喺短短一分鐘左右，同步一take過講咗數百字對白，而且無論動作、眼神、角度都完美一致，展現充份默契。當年呢一幕觀眾都一致大讚戲味十足，好有壓迫感。
《鬼同你OT》截圖
講到經典角色又點可以唔提帶挈佢奪得「最佳女主角」及「最受歡迎電視女角色」嘅《巨輪》角色「姚文英」，2013年阿田憑呢個角色擊敗勁敵鍾嘉欣、徐子珊、陳法拉及楊怡，成功晉身無綫當家花旦之一。
(《巨輪》截圖)
2017年阿田首次喺無綫劇中飾演反派，佢多次表示《迷》嘅角色係佢入行以來所遇過最難處理。劇中阿田先後喪夫同喪女，出現精神病，角色的內心戲及眼神轉變獲網民激讚，話佢嘅演技令人心寒！
(《迷》截圖)
撰文：黃蘊姿
責任編輯：楊安莉