【慘！又有旅行社捱唔住】逐一分析苦主點樣先有得賠

繼3月兩間網上旅行社停業，昨日威尼斯旅遊突然宣布結業，有約800名已繳費報團旅客未獲退款，涉約80萬港元。雖然威尼斯旅遊表示旅客可向旅遊業賠償基金申請賠償。不過實情真係會咁順利嗎？

第一關：旅遊業賠償基金

「旅遊業賠償基金」保障外遊旅客，如有繳付相等於0.15%外遊費印花徵費，當旅行社一旦倒閉可獲賠9成損失。不過要獲得呢項保障，旅行社首先要「倒閉」，今次威尼斯旅遊表明「結業」符合，但唔好開心住，旅客亦必須購買外遊「交通」、「住宿」、「活動」中最少兩項產品先得。即是如果單買機票或住宿並不受保障，而旅遊禮券或現金券亦不適用。如果真係咁唔好彩，就繼續睇落去。

{{hket:inline-image name="0417WLfeaturepage286.jpg"}}{{/hket:inline-image}}

▲旅客須購買外遊「交通」、「住宿」、「活動」中最少兩項產品，才可獲得「旅遊業賠償基金」保障。

第二關：信用卡退款申請

根據金管局資料，若消費者以信用卡一筆過繳付商品或服務款項，如日後對交易有所爭議，例如商戶倒閉未能提供服務，消費者可要求退還款項。如果未夠期找該筆卡數就好彩，只要提出證明發卡機構多數會凍結有關交易款項。

咁已繳又點？苦主可聯絡發卡行申請退款，發卡行了解有關爭議交易詳情後，會透過信用卡組織並根據規則代消費者向商戶使用的收單行要求退款，具體流程要向發卡行了解，但留意唔同機構有唔同條款及時間限制，例如由75日至120日不等，所以要盡早搞。

第三關：旅遊保險賠償

坊間有少數旅遊保險有保障旅行社「破產」條款，但「破產」屬於特定法律狀態，如果旅行社無法正常運作而又未進入「破產」程序，都未必可得到賠償。 

第四關：公司清盤

旅行社倒閉清盤，清盤人點算公司資產後會按照法定次序分配予債權人，首先會分配俾「有抵押貸款人」，然後有餘款先會分配俾「無抵押債權人」，消費者就係屬於「最後排」，相信到呢一步都唔駛指望有得賠。最後就只可以進行民事訴訟喇！

編輯：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/