【聲明】港生活網站並無進行電話推廣活動

蔡思貝令兄弟反目? 許廷鏗怕失好友胡鴻鈞

發佈時間: 2020/04/23

歌手許廷鏗(Alfred)和胡鴻鈞(Hubert)同是「巨聲幫」出身,二人超級friend底,甚至一度被傳成為密友,但自從傳出蔡思貝與胡鴻鈞拍拖後,兩兄弟即被指無偈傾。Alfred強調沒有反面,卻承認已很少聯絡Hubert,即使留言給他,對方亦甚少回覆。

許廷鏗昨日到商台宣傳新歌《無力感》,他透露新碟預計年底推出,未有因疫情而押後計劃。問他有否向胡鴻鈞分享新歌?Alfred只表示很多朋友已聽過新歌,亦有向他反映意見。他續稱︰「其實最近我同佢(Hubert)都少咗聯絡,唔好意思,如果你問我有關蔡思貝,其實我哋之間唔係好識,佢哋嘅嘢我都唔可以代答,亦都唔應該評論人哋。如果佢哋有進一步發展,我都係讀者,可以話番畀我聽都好。」

傳聞蔡思貝的出現,令他們兄弟反目,Alfred強調彼此沒有反面,但唔想失去這位好友。他解釋:「之前出席聚會都見唔到佢(Hubert),加上好少聯絡,咁當然希望朋友之間可以保持聯絡。(是否覺得對方有異性無人性?)我都有搵過佢,不過佢好少覆我,對上一次聯絡已經有一段時間,總之就算有乜嘢情緒都好,都希望盡快平靜落嚟,千祈唔好失去聯繫。」

po露膊相變沐浴新星

提到Alfred日前在社交網站上載幾張濕身露膊相,令人想入非非,有人留言說是沐浴新星。問他究竟受了甚麼刺激?Alfred笑指鄭欣宜叫他再露,但他認為露膊已是「露肉」底綫,「唔使畫公仔畫出腸,係咪會更性感?我覺得已經夠皮。大家可以將焦點放番喺呢首歌嘅MV,張振朗姪仔有參與拍攝,佢肥嘟嘟演技好好,似我細個都有啲圓潤,正所謂肥仔都是潛力股,希望佢有朝一日變成另一個張振朗。」

採訪、攝影︰Pauline

編輯:陳禮恒

美術:梁政敏

蔡思貝令兄弟反目? 許廷鏗怕失好友胡鴻鈞

胡鴻鈞與蔡思貝傳出緋聞,有指影響了跟許廷鏗的兄弟情。(資料圖片)

蔡思貝令兄弟反目? 許廷鏗怕失好友胡鴻鈞

許廷鏗分享露膊相,粉絲留言讚好。(IG圖片)