吳日言「懶媽」心聲︰ 勿讓子女過於依賴

今年36歲的吳日言（Yan）跟丈夫結婚3年，育有一名歲半大的女兒林禧茹（Beatrice），Yan跟天下母親一樣，對家中的女兒呵護備至，但她否認是「虎媽」，還自稱可算是一名「懶媽」。Yan笑笑口表示︰「其他媽咪對仔女所有事情都會好緊張，我就臨急抱佛腳！」

吳日言由初出道的稚氣「冬菇頭」，轉眼間進化成為今天的成熟少婦，每次提起愛女更盡是母愛。不過這位新手媽媽幾經艱辛才拿捏到一套個人湊女心得，事後亦大方與身邊的媽媽分享。Yan表示︰「我餵母乳餵咗8個月，每次都堅持畀BB食半小時，半小時後就唔再餵，等BB習慣在呢個時間內食完，慢慢就訓練到佢有好嘅習慣。同埋，BB喊時唔好即刻抱佢，我會觀察佢，如果佢食飽嘢、換晒片，純粹只係想扭抱嘅話，可以同佢傾偈，等佢唔好太依賴要抱。」

爆老公少做家務

Yan一手一腳照顧初生女兒，但「埋身餵」令她嚴重睡眠不足，難免會心火盛，Yan自爆曾對年幼的女兒咆哮，她說︰「我試過抱住佢大叫『你唔好再喊喇』，好彩老公有時都幫到我手，等我可以休息多啲，但佢始終少做家頭細務，有次洗阿囡啲『和尚袍』扭得太大力，扭斷晒啲繩。」

不少父母都望子成龍，自小就訓練子女琴棋書畫，樣樣都要出類拔萃，惟Yan認否是「虎媽」？她搞笑謂︰「我係『懶媽』先真，有啲媽媽對仔女所有事情都會好緊張，但我覺得有無需要呀？係咪咁逼切呀？好想乜都唔理，反而我老公就比較緊張，佢會提我係時候搵學校喇，因為要搵一間好學校唔容易，我心態有少少臨急抱佛腳。」

想女兒開心成長

那麼，Yan想自己的孩子將來成為一個怎麼樣的人？她坦言沒人會知道下一秒會發生甚麼事，也為香港的前景感到擔憂，所以最想女兒有一個無憂無慮的童年。她表示︰「依家呢個社會環境，自己身為父母都唔知可以畀到啲咩小朋友，都唔想佢諗咁多，開心最重要。」

Yan亦有意為女兒增添一名弟妹，但她似乎仍心大心細，她早前曾在社交網站撰文︰「踏入2020年，全世界一齊攬炒，無一件事係開心，我都好想正面啲去諗，但呢一刻有乜嘢值得去諗或者值得去做？」她又指︰「本想計劃生仔，但係依家咁嘅時勢，真係十五十六，點做啊！」

撰文︰倪小珊

編輯︰余運慶

美術︰梁政敏

攝影︰Benny、網上圖片