2016年香港先生冠軍黎振燁入行以嚟一直都以好好先生形象示人，喺佢當選香港先生當日仲同結咗婚一年嘅老婆當眾咀嘴大曬恩愛。黎振燁太太仲係佢嘅初戀情人，二人由中學開始已經無間斷咁拍拖。
(圖片：東星娛樂)
黎振燁讀書時已經想加入娛圈，原來老婆當初非常反對佢入行，因為覺得娛樂圈五光十色、紙醉金迷，有數之不盡的誘惑，好冇安全感。所以最後黎振燁做時裝設計，去到30歲先參加港男圓夢。不料最後黎振燁老婆一語成讖，近日黎振燁被爆出同有男友嘅無綫上位小花朱智賢車廂幽會，更有指佢因為朱智賢棄糟糠，早就打算同太太分居。不過，事件被揭發後，黎振燁立即回心轉意向太太箍煲求原諒...
「我初戀情人就係我老婆。」雖然聽落好完美，但現實終歸都未必可以盡如人意。人都總會對未嘗試過嘅嘢充滿好奇心，躍躍欲試，定力夠由是可；定力不足，一試就未必返到轉頭。所以都有說法話揀老公要揀有豐富戀愛經驗嘅男人，因為其時佢哋已經好清楚自己想要啲咩，亦冇咁容易受外來誘惑。
娛圈中有唔少男星都係緋聞大王，身邊女伴曾經有如走馬燈一樣，但當佢哋修心養性起上嚟，你就見佢哋斷斬所有桃花，唔再受外來誘惑。
（東星娛樂）
１.郭富城
郭富城入行之初曾同姚正菁拍拖，最後各有各忙分手，1994年拍攝電視劇《烈火狂奔》同袁潔瑩傳出緋聞，同鍾麗緹拍音樂特輯亦擦出火花，往後與朱茵及日本性感女神藤原紀香都因為合作而鬧緋聞。
郭富城同熊黛林由地下情轉而半公開，及後有傳因熊黛林迫婚不遂而分手。葉熙祺、苟芸慧等都傳過緋聞，但一概都無疾而終。直到2015年他在微博公開與方媛手拖手合照，係城城入行31年來首次主動公開戀情，並且開花結果拍拖2年幾就決定結婚，依家城城提親老婆同兩個囡囡都甜笑，變咗一個Family man。
（東星娛樂）
2.鄭嘉穎
鄭嘉穎出道初期同王馨平有過6年情。鄭嘉穎同周麗淇因為合作拍劇撻着，最後因為被指暗撻佘詩曼不歡而散。2010年同國產模特兒徐靖雯戀情曝光，隨即分手。拍攝《步步驚心》期間都曾經同劇中演員劉心悠和內地女星劉詩詩先後傳出緋聞。最後鄭嘉穎拍攝《殭》時被陳凱琳收服，愛錫老婆之情經常溢於言表。鄭嘉穎喺同陳凱琳婚禮上講：「10年前，我同媽媽講過我應該都唔會結婚，直至遇上陳凱琳，一切都變咗！」
（東星娛樂）
３.周杰倫
周杰倫自2014年公開承認同昆凌拍拖，之後仲畀女方一個童話式嘅婚禮，不時公開放閃。喺同昆凌一齊之前，周杰倫換畫速度快過打針，更被指因為侯佩岑介入而同拍拖多時嘅蔡依林分手，不過最後周侯戀都係無疾而終。另外，徐若瑄、曾愷玹、溫嵐、桂綸鎂等多個女星都因為合作而傳出緋聞，簡直就係緋聞磁石。
（東星娛樂）
4.陳冠希
陳冠希女伴嘅多到有如恆河沙數，廣為人知嘅有阿嬌鍾欣潼、陳文媛、張栢芝、Cammi謝芷蕙、洪文安、楊永晴、黃榕等等，講唔出名嘅都仲有一大堆。不過陳冠希最後情定模特兒秦舒培，二人更育有一女，陳冠希自此都冇再爆出異常嘅男女關係。
（東星娛樂）
5.林峯
林峯曾經愛的宣言「7愛」吳千語應該係佢最為人記得嘅一段情，但喺佢同吳千語一齊之前，緋聞女友都唔少，有李彩華、潘霜霜、鍾嘉欣、陳嘉桓、葉璇同佘詩曼等。不過林峯上年終於宣布同張馨月結婚，女方更融入家中，深得林峯家人喜愛。
撰文：黃蘊姿
責任編輯：楊安莉