第39屆香港電影金像獎頒獎典禮今日下午舉行，因應新冠肺炎疫情，頒獎禮改為網上直播，並安排金像獎主席爾冬陞宣讀各獎項得獎結果。其中最佳男配角則由《麥路人》嘅張達明奪得。
（《麥路人》劇照）
張達明首奪最佳男配角，不過原來宣布結果嘅一刻佢瞓緊晏覺：「呢個獎唔係我嘅，係屬於成部戲所有演員、導演同工作人員，你哋做得好我先做得到，恭喜晒，希望套戲快啲上映，同埋得到更好嘅回響啦！」佢表示有恭喜曾志偉，因為志偉嘅阿仔曾國祥執導嘅《少年的你》成大贏家，佢亦戥同片嘅郭富城失落影帝感到可惜，表示覺得對方係一個好演員。
相關新聞：【第39屆香港電影金像獎頒獎典禮】69歲太保從影50年首奪金像獎影帝 《少年的你》獲8獎成大贏家
（網上圖片）
現年55歲嘅張達明畢業於演藝學院，集演員、編劇、導演於一身。早年他主力在舞台劇演出及寫劇本，1995年與黃子華合作棟篤笑而被觀眾認識，其後主力參與電視及電影。一向不乏觀眾緣達明喺演藝事業上都可以話係一帆風順。
（東星娛樂）
但好景不常，2011年達明罹患鼻咽癌，多年嚟面對治療，身體至今仍未復原，身體珀金含量一度超標63倍。達明指雖然金屬已經排走咗，但出現嚴重後遺：「對腳會麻痹，腿部嘅肌肉會一路萎縮同退化，所以行路會好慢，同埋我之前做過大量化療、電療，腦部受到影響，醫生話將來有機會腫脹變成瘤。」
（東星娛樂）
患癌前，達明自覺係幸運兒，事業家庭皆得意，但一場大病導致佢離婚更加陷入財困，佢直言曾有一剎那想尋死，但諗到一對仔女先打消念頭：「好彩我有家人、朋友支持，所以一切事都唔重要。」
達明喺身體只得有限行動力嘅情況下，接演電影《麥路人》，然而達明嘅努力並冇白費，今日憑電影奪得香港電影金像獎「最佳男配角」。達明笑言大病過後嘅「造型」好適合演呢個角色：「我頸嘅瘦、少頭髮、身體虛弱行路慢，都係本身嘅情況，哈哈！」又指接到劇本時已好喜歡，覺得很有緣，因他寫嘅第一個舞台劇劇本《圍板外》都係講露宿者。
（東星娛樂）
達明直言睇完劇本已經喊，覺得同自己人生有啲相似，但佢仍然非常正面：「我到呢一刻都覺得世界係美麗嘅。」曾經爬得高，亦因此跌得更痛，但亦表示多謝上天，令佢可以喺低處欣賞到唔同嘅嘢。
（東星娛樂）
達明自言依家只可以演啲靜態電影，之前原本有一部電影搵佢做男主角，但因為太多動作戲應付唔到。不過佢就話可以演類似《催眠．裁決》嘅戲，律師、陪審團甚至催眠師都得。
撰文：黃蘊姿