「樂善堂轉贈愛計劃」 助93學校基層學生

黛安知道疫情下唔少基層家庭都面對經濟問題。公關姊妹話，九龍樂善堂同夥伴機構「學校起動」計劃、以及港大社會科學院，發動咗「樂善堂轉贈愛計劃We Share！We Can！」，為有家庭財政困難嘅學生提供一次性緊急經濟援助，善心人可以出一分力幫助佢哋！計劃針對93間學校，喺復課日5月27號開始提供經濟援助，個案會由學校校長或班主任推薦，樂善堂會以「零」行政費收集善款，全數善款轉贈畀有需要學生。

聽姐妹講，九龍樂善堂主席陳李玉佩已率先捐出50萬元，再配對常務總理會50萬元，合共100萬元作為起動基金。陳太仲呼籲，政府嚟緊會全民派1萬元，希望善心人能將錢轉贈給有經濟困難嘅學生家庭。捐款可上︰www.loksintong.org網址，或WhatsApp 5485 1633。