黑髮黑面扮律師 黃翠如被蕭正楠嘲惡婆

黃翠如昨日到無綫電視城出席新劇《七公主》造型活動，她在劇中首次挑戰心狠手辣的律師，特別染黑髮迎接新角色，但老公蕭正楠卻大呻唔習慣。翠如沾沾自喜說︰「我就係要呢種感覺。」

黃翠如、林夏薇、高海寧（高Ling）與陸永等昨日以新劇造型亮相，為角色剪短兼染黑髮的翠如說：「角色係我入行以來最大嘅挑戰，我做一個狠辣嘅律師，鍾意贏又唔友善嘅。」她笑指老公蕭正楠看不慣她的新髮色：「佢話我染咗髮之後個樣惡咗，我就係要呢種感覺。」她參考鄭裕玲的經典律師角色，又努力熟背劇中的結案陳詞︰「一個案件要用十日去背，試過揸車都背緊。」

林夏薇在劇中與鄭子誠及徐榮有感情綫，更要與徐榮演甚激的親熱戲：「我睇劇本時都『嘩』咗一聲，場戲要我除晒衫，又要喊，情緒起伏好大，為咗容易啲進入角色，我已經同老公講拍劇嗰段時間要分房瞓。因為開工就要全程投入，惟有推遲造人計劃。」對於林峯太太張馨月疑似陀B？林夏薇說︰「只係江湖傳聞，由佢哋自己宣布啦！」

陸永唔嬲Do姐搵姜濤

飾演司機的高海寧與陸永有不少對手戲，紮胸上陣的高Ling造型包到冚，但陸永笑言不會失望。高Ling自爆劇中會被半裸小鮮肉包圍，艷福不淺，陸永搞笑說︰「艷福係我呢種質素，正唔正先？」提到鄭裕玲（Do姐）飛起農夫，與姜濤及ERROR成員肥仔拍廣告，陸永說︰「都要放Do姐出去玩下，網友話佢哋扮農夫，有乜可能姜濤扮我，太侮辱姜濤喇，但C君同肥仔嘅顏值的確有啲似！」

採訪︰倪小珊

編輯︰李潔盈

美術︰梁政敏

攝影︰林良明