《我和殭屍有個約會》「況天佑」尹天照日前（14日）上載自拍照，顯示自己剛跑完8公里長跑，55歲的他身形仲好弗。現時他常北上登台，上年仲拍福音電影《奇蹟.13》，支持者不少。風光背後，他曾在有線電視節目《是敢的》自揭人生的高低起跌。
(尹天照微博圖片)
(尹天照微博圖片)
尹天照自言性格百厭，小學常丟粉刷，剛好擲中黑社會背景的同學。對方打他，他想推開那名同學，差點把對方推下5樓。中學畢業後，尹天照曾做侍應、買賣樓宇。本來得到姐夫的堂弟介紹到TVB考藝員訓練班，不過前幾日他與朋友被30個黑社會丟玻璃樽、毆打、搶劫，金鏈被搶，雙眼還被打到像皮蛋一樣。他惟有帶傷面試，最後面試失敗。
後來尹天照被同學鼓勵投考亞洲電視藝訓班，雖然考到入去，但他反叛性格未改：「我、駱達華同吳廷燁喺班入面最爛玩，會掟凳、追打。有次玩到追入廁所，我講粗口，拍門叫佢哋出黎嚟，原來其中一個廁格係校長。」校長要他收拾東西離開，尹天照就話每個人都會犯錯，校長叫他在幾個月內變好才能留低。他決心改過，每日幫同學抺枱凳、執枱、排好凳，最後校長當眾讚賞他。
(有線電視截圖)
(有線電視截圖)
後來尹天照未畢業就擔正做男主角，可是一個鏡頭拍了40多次，常被責罵，他憋不住坐在地上喊：「嗰陣佢話：『你幾錢人工呀？』、『知唔知菲林幾貴？』，一直問候我，帶20個阿媽返嚟都唔夠開工。」自此他決定演好所有角色。
99年他憑《我和殭屍有個約會》聲名大噪，不但成為視帝，亦成為亞洲電視首席當家小生， 然而他當年曾受到過不公平對待：「一有TVB人入嚟，我哋即刻變茄哩啡，我好嬲，覺得好唔公平。你哋呢啲大哥大姐入嚟，我睇你有乜能力演得好過我，睇你點樣打贏我。因為我有呢個憤怒，令自己演得更好。」
(亞視電視截圖)
(有線電視截圖)
直到2010年，尹天照老婆不幸患上血癌，他亦因為太擔心出現類風濕痛症，冇辦法工作，收入幾乎歸零。那時候他幾乎崩潰，幸靠朋友認識基督教，情緒才穩定下來：「以前我為工作做好自己，但經歷咗段日子，我同太太都好辛苦，如果我唔信主我捱唔住。」為了照顧老婆，尹天照離開亞視，他說：「人生冇嘢係巴閉，最重要係家人。我唔想去咗拍戲，如果期間太太身體有咩狀況，人哋未必畀我走，（寧願）放棄晒所有嘢。」
尹太經歷過骨髓移植後，癌細胞終於消失，而尹天照亦回歸幕前。
(有線電視截圖)
撰文：張芷晴