【聲明】港生活網站並無進行電話推廣活動

黃翠如︰古巴似舊美國世界 旅行奇遇乍驚乍喜

發佈時間: 2020/05/22

藝人經常出埠工作,足迹踏遍世界各地,有時會因文化差異而鬧笑話,又或遇上出乎意料的、驚嚇的、窩心的奇遇。入行以來常主持旅遊節目、幾乎走遍七大洲的黃翠如,最難忘到訪古巴的經歷,以為一間外表奇貌不揚的餐館,必定食物質素平平,卻沒料到竟是色香味俱全!還有湯洛雯、許廷鏗和C君(鄭詩君)都各有奇遇,令他們刻骨銘心。

黃翠如任職有線電視期間,曾拍攝過不少旅遊節目,印象最難忘是中美洲的古巴。11年翠如拍攝節目《地平線上這個世界那些人》,首次踏足古巴,她表示︰「古巴係無其他地方可以媲美的,由踏足呢個國家第一步,完全見唔到任何廣告牌,其實係所有商業味道的東西都唔會見到,係一個另類世界。所有事物、房屋的裝修、傢俬等,全部都很『舊美國』feel,就好似去咗以前的荷里活電影裏面。我住的民宿,裏面的水晶燈、鏡、浴室布置等等,都好似瑪麗蓮夢露拍攝的電影場景。其實所有物品都係當地政府配給的,所以每間屋的布置都大同小異,我覺得好似生活係fantasy(幻想)世界!」

用膳無餐牌 廚師話晒事

翠如回想,連光顧餐廳都感覺很新奇,「印象中的餐廳,外面會有招牌或者廣告poster,但當地的餐廳係無㗎,就連餐牌都無,好似幫襯緊私房菜館,全部都由廚師發辦,總之佢煮咩你就食咩,感覺都幾有趣。至於電視節目,就好似睇緊教育台,令人覺得當地唔會畀呢個世界渲染。不過,若以為當地人比較守舊傳統,其實又唔係喎,我在街上見過一對情侶好激烈擁吻,當地人又鍾意去沙灘跳舞,所以我覺得呢個國家好傳奇,好似將啲熱情嘅人放在另類世界。」

許廷鏗︰獲波蘭人打氣「香港加油!」

許廷鏗(Alfred)三月初在新冠肺炎疫情期間,去了波蘭一星期進行拍攝工作,令他有很深的體會,「回程時最擔心,機艙所有人都加強防疫措施,做足衞生工夫,我估唔到坐飛機都要全程戴口罩。在波蘭我哋都盡量戴口罩,去到空曠地方拍攝才除低一陣。帶去的衣物都好講究,帶跣水物料的衫,冷衫一定唔帶,又經常噴消毒液。」

Alfred又表示,旅途上不論認識或不認識的人都會守望相助,若知道有人沒有口罩,立刻遞上一個給對方,他又說︰「去到一間商店,同店員傾偈,對方見我戴口罩,都好奇香港的情況真係咁差?我便跟他解釋,又教他用廣東話講『香港加油!』給大家打氣!真係無諗過遠方都收到打氣信息。」

C君︰遊台受訪曬爛國語

農夫的C君於12年到台灣旅遊,一心大快朵頤,但當前往每次訪台必到的刨冰店時,卻發現店舖已經結業,C君說︰「原來食店執笠對台灣人來說係大新聞,呢間店除咗當地人幫襯,香港人都好鍾意去,當時我左望右望之際,有香港人認得我,仲搵我影相合照,咁台灣傳媒見到呢條友咁多人圍住,於是走來話要訪問我,對那間食店執笠的睇法!死喇,我啲國語爛到不得了,幾辛苦先做完個訪問。最衰係當晚同朋友出外食飯時,咁啱播緊訪問我的片段,嗰下覺得好𤓓!最抵死係啲人cap圖畀番我睇,諗起都好鬼肉酸!」

湯洛雯︰比利時遇劫 失護照最擔心

湯洛雯苦笑旅遊奇遇是不開心經歷。「在英國讀書時,有次長假期同幾個同學去比利時玩,夾份租車周圍去。當年上網要去網吧,我們去到目的地就衝去上網,點知返回泊車地點,見到架車啲玻璃被打爛,財物唔見晒,最慘係passport同錢無咗,有朋友喺幾日後要返香港,當務之急係返英國補領passport。那是冬天,架車無玻璃,風吹過來凍得要命!去到邊境,哀求關員讓我們入境,最後搞咗一輪手續終於返到倫敦,朋友補領到passport(趕及坐機返港);那次經歷真係好嚇人!」

最抵鬧是靚湯和朋友竟然大膽地把財物全部放在車內,還要無人看管,她說︰「一直以為放在車內最安全嘛,呢個教訓提醒我以後唔好全部人離開車廂。」

採訪︰Pauline

編輯︰黃寶恩

美術︰顏玉玲

黃翠如︰古巴似舊美國世界 旅行奇遇乍驚乍喜

11年黃翠如往古巴拍旅遊節目,跟當地人近距離接觸,但她拍劇後,近年已減少做旅遊節目主持了!(網上截圖)

黃翠如︰古巴似舊美國世界 旅行奇遇乍驚乍喜

翠如表示在古巴外出用餐絕不便宜,但大讚比想像中好味。(網上截圖)

黃翠如︰古巴似舊美國世界 旅行奇遇乍驚乍喜

許廷鏗抗疫期間往波蘭工作,發現當地人防疫意識低。(IG圖片)

黃翠如︰古巴似舊美國世界 旅行奇遇乍驚乍喜

C君台灣旅遊時遇刨冰店突然結業,意外地成為當地新聞人物。(網上截圖)

黃翠如︰古巴似舊美國世界 旅行奇遇乍驚乍喜

湯洛雯13年曾到法國拍攝《走過浮華大地》。