【旅遊奇遇記】湯洛雯比利時被爆窗搶劫嚇破膽 C君意外上台灣新聞「無地自容」

香港地少人多，每逢周末長假出街都係摩肩接踵，感覺好似少少私人空間都冇，都咪話唔壓迫。所以好多香港人都鍾意去個旅行轉換環境，注重私隱嘅藝人更加會想去到一個冇人認識佢哋嘅地方「抖抖氣」。凡事都有兩面，旅行嘅魅力就係在於充滿未知之數，體驗唔同地方嘅風土人情；不過人在異地，有時人生路不熟都難免會遇到啲驚險嘢。

近月新冠肺炎疫情肆虐世界各地，為防止病毒流竄，全球嘅旅遊業幾乎完全停頓。相信大家都畀「旅行蟲」咬到周身痕，今日晴報為大家訪問咗幾位藝人，希望佢哋嘅「旅遊奇遇」可以畀大家望梅止渴，頂一頂「旅行癮」啦。

湯洛雯比利時遇劫

湯洛雯（靚湯）人見人愛，桃花旺到爆，第一時間令人諗到佢去旅行會唔會有好多艷遇。不過令佢最深刻嘅旅行奇遇竟然係一個不愉快經歷：「嗰時喺英國讀書，有次放長假期，同幾個同學去咗比利時玩，幾個人夾份租車周圍去。由於當年手機上網唔算好發達，每次上網都要去網吧，去到目的地就全部人落車衝去上網，之後返去泊車位置，見到成架車啲玻璃畀人打爛晒，車入面所有財物全部唔見晒，最慘係passport同錢都無埋，有個朋友幾日後就返香港，當務之急就係點樣補領passport。我哋揸車返英國，嗰時冬天，架車無玻璃，啲風吹埋嚟凍得要命！去到邊境，我哀求關員畀我哋入境，最後搞咗一輪手續終於可以返去倫敦，朋友都補領到passport，不過嗰次經歷真係好嚇人！」

{{hket:inline-image name="53881865_410768609689022_7765534409727302309_n.jpg"}}{{/hket:inline-image}}

（湯洛雯IG）

靚湯話佢哋一直以為將財物放喺車就最安全，亦一直有聽聞歐洲治安好差，但係無諗過會差到畀人打爆玻璃偷竊，不過呢件事令佢哋得到教訓，以後唔會再咁大意啦。

{{hket:inline-image name="16122636_380.jpg"}}{{/hket:inline-image}}

（湯洛雯IG）

許廷鏗對波蘭改觀 處處人情味濃

許廷鏗（Alfred）早前去到波蘭進行一星期拍攝工作，全球疫情爆發下令佢呢次旅程有好深嘅體會：「回程坐飛機返香港嘅時候最擔心，機艙所有人都加強阿疫措施，我自己都估唔到會有一日坐飛機要全程戴口罩，就算去到當地都盡量戴，只係去到空曠地方拍攝先除低一陣。帶去嘅衣物都講究啲，會帶一啲跣水物料嘅衫，冷衫一定唔會帶，又經常噴消毒液，總之同以前去旅行都好輕鬆嘅心情，今次完全唔一樣。」Alfred印象中嘅歐洲都係比較污糟，佢話估唔到波蘭係咁乾淨。

{{hket:inline-image name="71059479_723544291500243_2308721836293740279_n.jpg"}}{{/hket:inline-image}}

（Alfred IG）

Alfred又表示，旅程中就算係素未謀面嘅人都會守望相助，有人冇口罩都會立即畀一個給對方：「去到一間商店，同店員都有傾偈，對方見我戴口罩，都好奇香港嘅情況真係咁差？於是我同佢解釋，因為拍片緣故，仲教佢用廣東話講咗句『香港加油！』為大家打氣！無諗過遠方都收到打氣信息。」

黃翠如闖古巴「異世界」

旅遊達人黃翠如去過世界各地好多唔同嘅地方，而最令佢印象難忘嘅係一個中美洲國家—古巴。

{{hket:inline-image name="cuba_PriscillaWong16.jpg"}}{{/hket:inline-image}}

 （網上圖片）

翠如2011年因為拍攝有線節目《地平線上這個世界那些人》而首次踏足古巴，翠如表示：「古巴可以講得上係冇其他地方可以媲美。由踏足呢個國家開始，係完全見唔到任何廣告牌，其實係所有商業味嘅嘢都唔會見到，係一個另類世界。呢個地方見到嘅所有事、屋嘅裝修、傢俬全部都好「舊美國」，好似去咗以前嘅荷里活電影咁。我上次去住喺一間民宿，入面嘅水晶燈、鏡、浴室嘅佈置等等，都好似瑪麗蓮夢露拍攝的電影場景咁樣，其實入面嘅所有物品都係當地政府配給，所以每間屋嘅布置都大同小異，我覺得好似生活係fantasy嘅世界！」

{{hket:inline-image name="lob02.jpg"}}{{/hket:inline-image}}

 （網上圖片）

翠如提到，當地連嘅餐廳都係冇招牌或者廣告poster，就連餐牌都冇：「你會好似光顧緊一間私房菜館，如果你喺街上問當地人點樣去餐廳，佢哋會指住你去一個好似屋企嘅地方，當日食啲乜，好似魚、肉、蔬菜等等全部都由廚師發辦，總之佢煮乜你就食乜，感覺都幾有趣。至於當地嘅電視節目亦都令人感覺到係唔會畀個世界渲染，因為所有節目都好似教育台；當你以為當地人會比較守舊傳統，其實又唔係，我曾經喺街上見過一對情侶好激烈擁吻，當地人都鍾意去沙灘跳舞，所以我覺得呢個國家好傳奇，就好似將啲熱情嘅人放喺另類世界，雖然唔知道呢個國家仲係咪咁樣，但其實都好值得一去。」

{{hket:inline-image name="f22edb5b0dfae308de740d58f7e9b2b8saasftp20200221.jpg"}}{{/hket:inline-image}}

（東星娛樂）

C君台灣上新聞曬「肉酸國語」

農夫嘅C君十年前到台灣旅遊，一心諗住掃盡當地美食，點知去到幫襯一間刨冰店先發現原來已經結業，他說：「原來食店執笠對台灣人嚟講係一件大新聞，呢間店除咗當地人幫襯，香港人都好鍾意去，我左望右望之際，有香港人認得我，於是埋嚟搵我影相，卒之嚟採訪嘅台灣傳媒見到呢條友咁多人圍住，於是走過嚟話要訪問我，覺得間食店執笠有乜睇法！死喇，我啲國語爛到不得了，幾辛苦先做完個訪問。最衰就係當晚同朋友去另一間食店食晚飯，咁啱播緊新聞，就係訪問我嘅片段，嗰下覺得好𤓓！最抵死係啲人cap圖畀番我睇，諗起都好鬼肉酸！我都覺得自己專做埋啲核突嘢！哈哈！」

{{hket:inline-image name="3302fce9d4646c73cd9cbc6cb200127e.jpg"}}{{/hket:inline-image}}

（東星娛樂）

採訪：Pauline
撰文：黃蘊姿