蒙嘉慧憑《衛斯理》白素一角、《法證先鋒》系列梁小柔一角深入民心，自2013年約滿TVB之後，她多與香港電台合作，曾拍攝《火速救兵》、《有倉出租》，上年更參與邵氏劇集《飛虎之雷霆極戰》拍攝，在劇中與三哥苗僑偉有感情線。近日劇集於TVB播映，蒙嘉慧相隔7年終再在TVB亮相。
(TVB電視截圖)
今次蒙嘉慧飾演回流香港開時裝店的設計師，她接受TVB訪問表示：「再拍劇嘅感覺好唔同，原來拍攝模式有好大轉變，好多部機、唔使實景等。而且依家拍片可以自己想拍就自己試，唔使等人搵你做嘢。」她也分享與老公鄭伊健的家中生活點滴，表示以前拍戲成日整到周身傷而不自知，如今趁疫情留家經常互相拉筋做運動。
(TVB電視截圖)
蒙嘉慧與鄭伊健於2006年認識，拍拖大半年，女方已認定了男方。父母離婚，蒙嘉慧自小由婆婆湊大，婆婆患癌離世是其人生最大打擊，她曾接受有線電視節目《星級會客室》訪問回顧那天：「醫院成日叫我返去，伊健次次陪我，我唔好意思。嗰日我話自己去睇婆婆，點知真係走咗。」習慣獨立的蒙嘉慧覺得這些事應該一個人解決，她在節目邊講邊喊：「伊健凌晨5點打嚟問我去咗邊，我話屋企有喪事唔可以去人哋屋企，佢話：『你過嚟啦，一個人會好難過。』佢令我覺得佢就係我嘅家，好值得相信。呢個人會陪我到老，都幾好呀。」
(有線電視截圖)
拍拖7年，2013年結婚，蒙嘉慧曾被指多次逼婚，但她澄清：「逼佢又點？逼到求婚，咁幾時註冊？冇人逼到佢，佢話：『啲人愈講，我愈唔做。啱時間就做，唔會理其他人講咩。』」不過她認同二人有結婚需要：「我成日幫家人簽名做手術，如果到我出事要家人簽名，相處好耐嘅戀人冇簽名權力。」
多年來二人恩愛如初，蒙嘉慧大讚鄭伊健是好男人，有事做得不好、意見不合，不會發脾氣，只透過打機放下壓力：「佢話打機係唔畀自己去諗唔好嘅嘢。」有次他們發生交通意外，蒙嘉慧想問警察詳情，鄭伊健擔心她很大壓力，對身體不好，叫她不要煩著人家。但她不放心，堅持想打電話，兩人因而鬧交。最後鄭伊健主動讓步，說了一句：「我永遠支持你。」完美解決件事，連朋友都讚他很痛錫蒙嘉慧。
(有線電視截圖)
現時二人未有計畫生BB，蒙嘉慧解釋要照顧小朋友很大責任，從小安排他接受不同教育，擔心自己會忽略，做得不好，希望凡事隨緣。
(東星圖片)
撰文：張芷晴
責任編輯：楊安莉