張栢芝40歲生日 大仔Lucas窩心話冧爆媽咪

張栢芝昨日40歲生日，她前日提早在家舉行生日派對，身為壽星女的她大清早起床便準備炒飯及其他美食，而大仔謝振軒（Lucas）和細仔謝振南（Quintus）則分別使出「冧招」𠱁媽咪，令栢芝感動不已。

栢芝在昨日踏入凌晨一刻，於社交網上載生日相片及留言︰「多謝上天賜給我這一天，感恩有我身邊每一個人。」未知是否受到疫情影響，栢芝未有外出慶生，反而提前一天在家中舉行生日派對，而且落手落腳準備炒飯、咖喱豆卜魚蛋蘿蔔及茶葉蛋等美食，栢芝更拍片教炒飯，只見她準備了洋蔥、火腿、蛋和粟米等材料，十分豐富。

素顏出鏡的栢芝，鬼馬地用手機app替自己戴上口罩及配上兩隻可愛的熊耳仔，又指炒飯多油煙，所以晚上開P前才化粧。直至晚上派對完畢，栢芝又po了兩個生日蛋糕相上網，育有三子的她，透露雖然大仔Lucas沒有送禮物，但就由朝到晚陪伴在她左右，栢芝表示︰「佢解釋無送禮物畀我，因為都係用媽咪錢，佢覺得最好嘅禮物係一直陪伴喺我身邊，佢真係由朝早陪到我夜晚11點，我個仔真係好懂事，最好嘅禮物真係陪伴，呢番說話講中晒天下父母心，無論乜嘢禮物，都唔及聽到呢番說話咁sweet，佢用行動證明好錫我，感動到我想喊，我立即用眼鏡遮住唔敢流淚。」

Quintus哄媽咪睡覺

而二仔Quintus則昨晚踏正12點走入媽咪房，並拿着寫有生日字句的平板電腦給栢芝看，Quintus深知媽咪喜歡Hermès手袋，所以揀選了該品牌的代表顏色作為電腦熒幕底色，𠱁得栢芝開心笑不停，更搞笑叫Quintus將該份祝福儲存入電腦。之後Quintus向媽咪送上一個大大的擁抱，栢芝冧爆說︰「平時都係我送佢入房瞓覺，今晚佢話佢𠱁我瞓。各位晚安喇，40歲係人生新開始。」至於一歲多的孻仔張禮承（Marcus）可能是年紀太細，所以栢芝並沒有提及他。

撰文︰倪小珊

編輯︰黃寶恩

美術︰梁政敏