【聲明】港生活網站並無進行電話推廣活動

網購也有失望時

發佈時間: 2020/05/28

呢排多咗好多時間喺屋企,你有無網購多咗呢?我有。

除咗淘下寶之外,另一個破費渠道,就係來自facebook了。有時睇到佢哋彈出嚟嘅產品,介紹到可以飛上月球咁high,我自以為好精明,都會飄飄然咁攞張信用卡出嚟入貨,然後期待產品快啲到。到暫時為止,以10件貨品為例,令我唔滿意嘅佔3成左右,咁算叻定唔叻呢?

近期我就要推介下呢件超廢產品:電動萬用吸耳器。廣告話絕對不傷耳壁,將個神器嘴隊入個耳窿度,就能將耳內所有廢物吸得乾乾淨淨?好評一面倒,真係睇到我耳仔痕,希望即刻用部機嚟幫我「happy撩耳」。好期待!

終於,貨品到手了,即試!結果……吸力弱到連胡椒粉都吸唔到!我用200幾蚊買咗件廢物,激氣!

多咗件垃圾,掉咗佢,又令我內疚,因為而家市道咁差,浪費金錢係罪過;但唔掉咗佢,寸金尺土,佢又嘥咗我寶貴嘅小空間……結果,畀我諗到絕!招!即刻諗下邊個我唔鍾意嘅人生日,送畀佢做禮物!哈哈哈哈……有呢個諗法,即時令我從悲哀中有番啲快感。

買嘢應該係好開心嘅事,但係如果買件由期望變失望嘅物件,真係令人好無癮。如果係畀咗錢,墮入騙局,收唔到貨,仲嬲!所以大家網購絕對唔好畀自己太得意忘形呀!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭