黛安
黛安

港燈$500飲食券贈4萬基層 創興銀行捐2.5萬個口罩

發佈時間: 2020/05/29

港燈$500飲食券贈4萬基層 創興銀行捐2.5萬個口罩

疫情嚴重打擊香港經濟,黛安知道,港燈嘅「2加3紓緩措施」即日起向有需要嘅基層家庭派發總值$500飲食券,佢哋憑券可到參加「關懷有饍」計劃嘅220多間中小企食肆消費。聽港燈董事總經理尹志田分享,佢話中小企餐飲業用電量較高,希望協助中小企食肆,同時支援基層家庭。連同港燈早前為基層家庭發放餐飲費用嘅計劃,合共提供$2,300萬資助,裨益弱勢社群。

合資格家庭由即日起,只要向參與計劃嘅23間指定中心預約,攜同今年內嘅港燈住宅電費單正本,或最近3個月嘅劏房租金收據,連同身份證明文件做簡單登記,就可獲發一套20張、每張面值$25嘅飲食券,每家庭限領1套,名額共4萬套,先到先得。適用食肆名單已上載www.hkelectric.com/coupon。

港燈之外,創興銀行日前都向浸信會愛羣社區服務處、長者安居協會及香港聾人協進會,捐贈2.5萬個口罩及5,000支酒精搓手液,同基層朋友同渡「疫」境。創興銀行副主席兼行政總裁宗建新同黛安講,疫情持續幾個月,關注到基層家庭嘅防疫物資時有短缺,希望捐贈物資幫基層市民紓緩生活壓力。黛安覺得兩間企業都好有愛!

撰文: 黛安 消息特靈八卦公關
欄名: 八卦名利場