應采兒誕細仔「Hoho」 陳小春爆大仔Jasper勁妒忌

陳小春太太應采兒上周五（29日）宣布誕下細仔，昨日小春到養和醫院探望妻兒。再為人父的小春心情勁靚，透露細仔乳名「Hoho」，有「好好」的意思。他表示老婆應采兒選擇開刀剖腹產子，全因順產太辛苦：「生產過程好順利，我有入產房陪老婆，但我唔敢剪臍帶，交番畀醫生啦，手術費包咗㗎嘛！」問到大仔Jasper榮升哥哥有何感受？小春坦言Jasper妒忌弟弟：「Jasper見過細佬，都開心嘅，不過今日（昨日）佢感覺唔係咁舒服，所以今晚要返去𠱁下佢。佢之前問過我『咩叫jealous（妒忌）』，吓，我唔識答佢。」

小春笑指Jasper平日口水多多，但現在想講卻「開不了口」，幸好他已成功開解囝囝：「我應承同佢踩單車、睇波，佢即刻開心番，係有少少jealous。」另外，小春笑言今次再做爸爸感覺更好：「因為今次有個印象，加上細仔個樣似老婆多啲，我安心晒，戥番勻多啲！」會否再追個囡囡？他即說：「辛苦，唔啦！夠皮，一家四口，成雙成對。」