太陽娛樂老闆周焯華(洗米華)昨天46歲生日,而佢同老婆洗米嫂陳慧玲所生嘅細女周善潼(Damiana)咁啱就同爸爸同月同日生日,兩父女喺澳門舉行盛大嘅生日派對,洗米嫂陳慧玲尋日都喺社交網連開兩個Post分享溫情洋溢嘅相,見到佢幸福嘅勝利笑容,真係一切盡在不言中。
(陳慧玲IG)
見到相中嘅生日派對布景板寫上「Chau's Family DAMIANA & 華哥 Happy Birthday 2020」,佢哋為兩位壽星分別準備咗兩個大蛋糕,一個是Elsa造型蛋糕相信係畀萬千寵愛嘅囡囡,而另一個送畀周焯華嘅網球主題蛋糕則寫上「Ba B Happy Birthday」,非常有心思呀!
(陳慧玲IG)
而洗米華興奮抱着細女吹蠟燭,囡囡則攬到實錫錫爸爸,父女情深,好肉緊呀。相中亦見到洗米華攬實洗米嫂,另外,出席派對的家人,還包括洗米華跟前妻所生的兒子周柏豪﹑洗米華父親和家姐等,一家聚首真係好溫韾。
(陳慧玲IG)
一向Mean到爆嘅網民都罕有一致咁喺洗米嫂嘅社交網站送上祝福,大讚洗米嫂愈嚟愈索之餘更加認為佢係「大婆」嘅典範,紛紛留低「邪不能勝正」等Comment,彷彿仲開心過自己「贏」番個老公。
(陳慧玲IG)
洗米嫂嘅正印之路實在一啲都唔好行,被稱為「宇宙最強第三者」嘅Mandy Lieu 2014年同洗米華被影到行為親密,洗米華後來更加高調拖女方出巡,二人更先後生咗3名子女。
Mandy Lieu與洗米華(東星娛樂)
洗米嫂一度選擇有尊嚴地主動申請離婚,大家都以為Mandy會得償所願成為周太,但洗米華並冇於離婚協議書上簽字,半年後更於朋友生日會上,借醉向Heidi示愛,憑歌寄意,攬住她唱《愛我別走》,更當眾高呼「我只得一個周太」,又感慨表示與洗米嫂「久別重逢」,令洗米嫂一度激動爆喊。
(陳慧玲IG)
洗米嫂亦冇埋頭埋腦咁呼天搶地,繼續留守家庭,對於丈夫與前妻所生的大仔周柏豪視如己出,柏豪多次公開表示同洗米嫂關係良好;洗米嫂亦對於老爺照顧有加,經常帶全家人出遊,贏盡周家上下人心。
(陳慧玲IG)
洗米嫂亦積極開拓個人事業,涉獵範圍從餐飲零售到設計工程,以至公關廣告等,更榮獲世界傑出華人青年企業家獎,展現其女強人一面,對內對外都咁出色。
(陳慧玲IG)
洗米嫂公私兩忙都冇忽略打理自己,將身心都保持在最佳狀態,對生活充滿熱情之餘亦經常做運動,每日都打扮得花枝招展,佢係點樣愈變愈靚,可以話係有目共睹!
(陳慧玲IG)
撰文:黃蘊姿