【棺材床】家長為子女訂造組合式「睡房」 被網民嘲似「棺材」：只係多兩個洞

香港寸金尺土，用每呎每吋前都要「諗過度過」才能物盡其用。有傢俬設計公司曾為顧客設計「儲物櫃工人房」備受批評，近日又有同類情況出現，有家長透過傢俬設計公司，訂造一組兒童組合床，其封閉性設計被網民質疑似「棺材床」，指「睇到（相片）都焗」。

有本地傢俬設計公司Facebook專頁上分享一組相片，指該項目為組合櫃床，為一戶天水圍住戶製作，帖文更標籤著「廳櫃」、「上格床」、「隔房」、「兒童」、「衣櫃」、「樓梯櫃」、「鞋櫃」等，但未有列明相關項目的尺寸及收費。

從相片可見，該組合櫃下層為多個收納空間，就連樓梯都設計為抽屜，相當實用；最為人爭議的是上層設計，上格床以封閉式設計，當中兩個米奇老鼠形狀洞口最為吸睛，相信是設計給小朋友使用，另外亦有一扇窗及一道小門。

網民反應兩極 被嘲似「棺材」

該組設計吸引不少網民留言關注，反應兩極，不少人紛紛留言查問價格及尺寸，更大讚設計「幾得意」，又指「可以用來做工人房都得」。另一邊廂，亦有網民擔心上床設計會否「好焗」，該公司回應指：「 有通風口，呢個唔會（好焗）」，網民質疑「點解咁多人有興趣？真係畀得人瞓？」、

「似棺材多啲，只係多咗兩個洞，望落去都覺得焗」。

撰文：劉紀瑩