《降魔的》第３輯有劇本？ 劉佩玥期待「啤啤」成魔

無綫劇集《降魔的2.0》日前播完大結局，有指計劃開拍第三輯，劇本亦已經在手。在《降魔的2.0》飾演女鬼「啤啤」的劉佩玥（Moon），昨日現身電視城時，表示要看監製會否安排她演出第三輯，演過人類和鬼魂的她，以「魔」的身份出現也可。

《降魔的2.0》上周五大結局，一眾演員劉佩玥（Moon）、胡鴻鈞、譚凱琪等一齊食飯睇大結局，請客的主角馬國明因工作關係遲到，到場後負責埋單。昨日Moon與陳展鵬在電視城為新劇《超能使者》開工，提到《降魔的2.0》留下不少伏綫開拍第三輯，更指第三輯劇本已經出爐，「啤啤」Moon笑說：「我唔敢劇透，我喺第一輯死咗，第二輯變咗『阿飄』（鬼魂），所以第三輯乜嘢可能都會發生。我自己想做天使，或者講到我成魔都得，不過要睇監製安排。」

昨日Moon與展鵬拍攝《超能使者》開場重頭戲，穿上病人衫的展鵬劇透說：「呢場戲講我同唐詩詠撞車之後，就發現有超能力。」飾演展鵬老婆的Moon則往醫院探望。問Moon在劇中擁有甚麼超能力？她講笑說：「咪係超低能同勁搞笑囉！」

與陳展鵬多「床戲」

問到二人飾演夫妻，可會有親熱戲？展鵬笑指他們有很多床戲：「係床邊傾偈嘅戲。」展鵬又大爆有場戲他要抱起Moon去急症室：「我覺得Moon比想像中輕，抱佢嗰陣無手震。」Moon聞言講笑說：「我就係擔心自己太重，展鵬會抱得好辛苦，所以為咗你食素減肥。」及後她解釋自己希望身體健康些，所以茹素近半年：「結果成功減咗磅，仲比以前開心咗。」

另外，父親節將至，二人皆表示當日要開工，展鵬說：「我自己慶唔慶祝都無所謂，反而想約爸爸飲茶。」Moon則說：「爸爸明白我做呢行，可能正日未必慶祝到，就會食飯補祝，最緊要一家人開開心心。」

採訪︰Pauline

攝影︰林良明

編輯：李潔盈

美術：梁政敏