【聲明】港生活網站並無進行電話推廣活動

尖沙咀麥田捕手市集 揀個性父親節禮物好去處

發佈時間: 2020/06/09

黛安一向好支持本地手作產品,原來嚟緊兩個周末(6月13、14、20及21日),由麥田捕手舉辦嘅「CreARTive Popup Collection手作市集」,就會喺尖沙咀美麗華廣場Mira Place B1/F中庭舉行。集合咗30個本地手作品牌,展出過百款唔同類型嘅工藝及設計產品,例如手作皮革製品、本地手工啤酒、手工烘焙食品、針織刺繡布藝等,仲有部分本地手作嘅天然護理用品,好吸引啊!

父親節好快就到,未買禮物嘅話可以去市集揀下啊。黛安就推薦大家去睇下「imleatherroom」呢個品牌,佢哋專做特色皮革手縫產品,鎖匙扣、銀包等,實有一款啱爸爸嘅。另外,WoodWatchHK「木表」就係用唔同地方回收返嚟嘅木材,製作成個性化手錶,獨特又環保。

場內仲有唔少靚靚飾品同配件,可以滿足大家嘅少女心㗎。好似Cubplus「驕品」呢個香港品牌,作品創作靈感源自歐洲18世紀皇室玻璃藝術收藏品,每件作品都呈現出獨特質感同色彩圖案,真係好靚㗎。至於「Thai Natural泰天然」嘅自家手工精油護理產品亦都好吸引。有咁多好物,千祈唔好錯過啊。

撰文: 黛安 消息特靈八卦公關
欄名: 八卦名利場