當藝人站上舞台表演時，都會百分百投入，力臻完美。但是，原來演出背後會遇到不少尷尬事，最常發生的是「走光」，女的忘記「打底」，男的忘記拉褲鏈，若幸運地及時發現，立即「執生」可化險為夷；但如果被台下幾百對眼睛望住才醒覺自己出醜人前，真的恨不得搵窿捐！吳卓羲、鄧佩儀、麥長青（麥包）和薛家燕大爆自己的「瘀」事，令人忍俊不禁。
吳卓羲在熱播劇《飛虎之雷霆極戰》飾演特別行動組章Sir，舞蹈員出身的他，有豐富的演出經驗，但亦曾遇上一件令他非常尷尬的事，就是上台忘記拉褲鏈！他表示︰「我喺上台表演途中，先發現唔記得拉褲鏈，雖然無穿崩，但仲唔夠尷尬咩！惟有唱唱下歌中途轉身，嗱嗱聲拉番條褲鏈，好彩嗰次係唱歌而唔係做訪問環節。不過呢個尷尬畫面已經畀台下觀眾睇到晒，最慘仲要係個高度同觀眾席成水平綫，想望唔到至奇！」
Ron表示，那時正值在TVB最忙碌的時候，每日都幾乎睡眠不足，他笑言︰「所以連最緊要嘅褲鏈都唔記得拉囉，不過都係試過一次啫！之後每次上台前都提醒自己，一定要檢查清楚係咪拉咗褲鏈，真係『頭可以唔吹，褲鏈一定要記得拉』。」
薛家燕︰無着打底裙瘀足幾十年
家燕姐入行多年，提到人生的瘀事，她立即回想起︰「大約喺60年代，嗰次去星馬登台，一日趕八場，走兩間戲院，每場演出七個節目，好趕！好趕！試過有一場由古裝轉西班牙服裝跳舞，又係好趕咁出場，出到場心情好興奮，同觀眾用西班牙文打招呼，仲拉高條裙準備跳舞，點知突然發現自己原來忘記咗打底，當時全場嘩咗一聲，我就尷尬到嗱嗱聲返入後台。」
當時家燕姐才16歲，每次演出媽咪都會陪伴着她，家薛姐說︰「我返到後台，媽咪話我趕時間搞到唔記得打底就衝出舞台，嗰一刻我真係好尷尬，都唔知點樣再行出去面對觀眾，最後我都要硬着頭皮行出舞台，我仲記得當時啲觀眾好興奮大叫encore，之後總算順利完成演出。呢件事真係好瘀，隔咗幾十年我都仲記得，哈哈！」
鄧佩儀︰表演時上衣鬆脫好驚險
在加拿大成長的鄧佩儀（Gloria），自言在讀書時期曾有幾件尷尬不已的往事。她約17歲的時候，有次參加學校的歌唱比賽，亦是人生第一次上台參賽，她說︰「嗰次仲係自彈自唱，上台前信心十足，特登揀咗件一字膊衫，打扮得靚靚咁上台表演。件衫胸前係綁帶嘅，點知表演中途突然發現件衫有一邊膊頭位開始鬆，件衫好似就快跌落嚟，表演到中途，我忍唔住停低整番好件衫，全場即刻大笑起來，我就真係好尷尬囉！」事後她的朋友都表示在台下目睹情況，也替她抹一額汗。雖然這段小插曲未有影響賽果，卻足以令她尷尬到想搵窿捐！
Gloria繼續自爆另一件在大學時發生的瘀事，當年正值少女情懷的她，暗戀校內一名男生，「有次在課堂間的小休時間，喺走廊迎面見到呢位心儀對象，原本我想擺個靚樣吸引對方注意，唔知點解突然整個人跌低，呢個畫面對方應該睇到晒，真係好瘀！」
麥長青︰錯手拍落女同事心口
男士們最尷尬莫過於錯手觸及女性敏感部位，小則尷尬一笑，嚴重的可能被指性騷擾，真的水洗都唔清！麥長青（麥包）曾經試過同類事件，可幸他一向形象正面，未有被人誤會是色狼。他回憶︰「件事發生喺I.P（舊清水灣電視城），一日喺服裝間換衫，嗰度地方狹窄，隔籬企咗個服裝部女仔。我試衫時唔小心一手拍咗落個女仔胸部，初時我未知發生咩事，幸好對方未有誤會我，反而笑笑口問︰『係咪有彈性？得唔得？』嘩！我尷尬到呢，不過大家都知道我係唔覺意！」麥包重提往事，依然一臉尷尬。
另一件令他感到十萬個不好意思的𤓓事，「試過拍外景有個break，一班人去茶餐廳食tea，食飽趕返去開工，竟然唔記得畀錢，之後先醒起，但係開緊工根本無時間返去餐廳找數，幾日後終於抽到時間返去畀番錢，好彩老闆好好無怪我，佢仲話︰『請你食啦！』我話唔好，錢一定要畀，唔想畀人誤會係呃飲呃食，食完嘢唔畀錢，個心始終唔安樂。畀番錢老闆後，佢請我食咗個茶餐！香港好在仲有一班好街坊，呢種人情味好親切。」
採訪︰Pauline
編輯︰黃寶恩
美術︰梁政敏