【藝人尷尬往事】薛家燕星馬登台忘打底全場嘩然 吳卓羲唱歌唔記得拉褲鏈超尷尬

無論是甚麼演出，藝人都會準備充足，務求以最佳狀態示人。不過有些藝人在演出背後都曾發生尷尬事。若及時發現，可立即「執生」；如果被發現才醒覺自己已出醜人前，真的為時已晚，尷尬非常！《晴報》訪問咗幾位藝人，包括吳卓羲、鄧佩儀、麥長青（麥包）和薛家燕，佢哋都大爆自己的「瘀」事，更指事件發生後都會引以為鑑！

薛家燕着裙跳舞冇打底

家燕姐50年代末以童星身份出道，年紀細細已經喺媽媽陪同下到馬來西亞登台。而家燕姐入行多年，當年也有瘀事發生，至今仍記憶猶新，：「我記得大約喺60年代，嗰次去星馬登台，一日趕八場，走兩間戲院，每場演出七個節目，好趕！好趕！試過有一場由古裝轉西班牙服裝跳舞，又係好趕咁出場，出到場仲好興奮，同觀眾用西班牙文打招呼，仲拉高條裙準備跳舞，突然發覺原來忘記咗打底，當時全場嘩一聲，我就尷尬到即刻嗱嗱聲返入後台。」

{{hket:inline-image name="3.jpg"}}{{/hket:inline-image}}

(圖片：東星娛樂)

當時家燕姐才16歲，她說：「我返到後台，媽咪仲話我咁趕時間搞到唔記得咗打底就衝出舞台，嗰一刻我真係好尷尬，都唔知點樣行出台面對觀眾，當然最後都要硬着頭皮行出舞台，我仲記得當時啲觀眾好興奮咁大叫encore，之後總算順利完成演出，不過媽咪就同我講以後真係要小心啲先得，呢件事真係好瘀，搞到隔咗幾十年我都仲記得，哈哈！」當年曾發生嘅蝦碌事，如今家燕姐已當成笑話一則，並引以為鑑。

吳卓羲忘記拉褲鏈

最近在《飛虎之雷霆極戰》飾演特別行動組章Sir的吳卓羲(Ron)是舞蹈員出身，出道多年，除了拍劇同拍電影之外，他亦曾是歌手及舉行演唱會。

{{hket:inline-image name="L1000009.jpg"}}{{/hket:inline-image}}

(圖片：《飛虎之雷霆極戰》劇照)

雖然Ron有好多演出經驗，但他亦曾發生「瘀」事，令他十分尷尬！他表示：「我喺上台表演途中，先發現唔記得拉褲鏈。雖然無穿崩，但仲唔夠尷尬咩！惟有唱唱吓歌中途轉身，拿拿聲拉返高條褲鏈，好采嗰次係唱歌而唔係做訪問。不過呢個尷尬畫面都已經畀台下觀眾睇到晒，最慘仲要係個高度同觀眾席水平線，想望唔到至奇！」

{{hket:inline-image name="2.jpg"}}{{/hket:inline-image}}

(圖片：東星娛樂)

Ron表示，那時正值在TVB最忙碌的時候，每日都幾乎睡眠不足，他笑言︰「所以連最緊要嘅褲鏈都唔記得拉囉，不過都係試過一次啫！之後每次上台前都提醒自己，一定要檢查清楚係咪拉咗褲鏈，真係『頭可以唔吹，褲鏈一定要記得拉』。」

相關新聞：【飛虎之雷霆極戰】黃宗澤挑戰全英語對白拍談判戲 陳奕迅大曬流利英文令人「耳朵懷孕」

麥包曾錯手拍落女同事胸部

男士們最尷尬莫過於錯手觸及女性敏感部位，小則尷尬一笑，嚴重的可能被指性騷擾，真的水洗都唔清！麥包曾經試過同類事件，他說︰「件事發生喺I.P（舊清水灣電視城），一日喺服裝間換衫，嗰度地方狹窄，隔籬企咗個服裝部女仔。我試衫時唔小心一手拍咗落個女仔胸部，初時我未知發生咩事，幸好對方未有誤會我，反而笑笑口問︰『係咪有彈性？得唔得？』嘩！我尷尬到呢，不過大家都知道我係唔覺意！」可幸他一向形象正面，未有被人誤會。

{{hket:inline-image name="1.jpg"}}{{/hket:inline-image}}

(圖片：東星娛樂)

麥包繼續談及另一件令他感到十萬個不好意思的𤓓事：「試過拍外景有個break，一班人去茶餐廳食tea，食飽趕返去開工，竟然唔記得畀錢，之後先醒起，但係開緊工根本無時間返去餐廳找數，幾日後終於抽到時間返去畀番錢，好采老闆好好無怪我，佢仲話︰『請你食啦！』我話唔好，錢一定要畀，唔想畀人誤會係呃飲呃食，食完嘢唔畀錢，個心始終唔安樂。畀番錢老闆後，佢請我食咗個茶餐！香港好在仲有一班好街坊，呢種人情味好親切。」呢件𤓓事仲令麥包深深體會到香港街坊嘅人情味。

相關新聞：【中佬唔易做】張松枝信心爆棚見工囂過面試官 麥包搵工靠朋友上堂竟然瞌眼瞓

鄧佩儀在表演途中件衫鬆脫

鄧佩儀（Gloria）在香港出生，後移民加拿大，在2012年參選溫哥華華裔小姐奪冠後回流香港加入TVB。Gloria指尷尬往事都在讀書時期發生。第一件是在約17歲、第一次參加學校的歌唱比賽時發生，她說︰「嗰次仲係自彈自唱，上台前信心十足，特登揀咗件一字膊衫，打扮得靚靚咁上台表演。件衫胸前係綁帶嘅，點知表演中途突然發現件衫有一邊膊頭位開始鬆，件衫好似就快跌落嚟，表演到中途，我忍唔住停低整番好件衫，全場即刻大笑起來，我就真係好尷尬囉！」事後她的朋友表示在台下目睹情況替她抹一額汗。雖然這段小插曲未有影響賽果，卻足以令她尷尬到想搵窿捐！

{{hket:inline-image name="4.jpg"}}{{/hket:inline-image}}

(圖片：東星娛樂)

另一件瘀事在大學時發生，當年Gloria正值少女情懷暗戀校內一名男生，「有次在課堂間的小休時間，喺走廊迎面見到呢位心儀對象，原本我想擺個靚樣吸引對方注意，唔知點解突然整個人跌低，呢個畫面對方應該睇到晒，真係好瘀！」

採訪：Pauline
撰文：林惠珊
責任編輯：楊安莉