黛安
黛安

IVE奪世界太陽能車挑戰賽季軍 力壓世界名校車隊

發佈時間: 2020/06/11

IVE奪世界太陽能車挑戰賽季軍 力壓世界名校車隊

每兩年舉辦一次嘅「世界太陽能車挑戰賽」,滙聚全球大專院校及企業等組織嘅太陽能車作技術較量,絕對唔簡單。香港專業教育學院(IVE)工程學科自行研製嘅太陽能電動車SOPHIE 6s,今屆都有參賽,仲力壓英國劍橋大學等世界著名學府勇奪季軍,取得歷年參賽以來最好嘅成績!

黛安知道,今屆比賽去年底喺澳洲舉行,有差唔多40隊來自世界各地嘅車隊參與,包括英、澳、德等國;參賽隊伍需由北至南穿越澳洲大陸,歷時6天。IVE工程學科自行研製嘅太陽能電動車SOPHIE 6s,今屆就出戰難度同挑戰性極高嘅「Cruiser Class」(房車賽)賽事,佢哋成功穿越澳洲3,000公里嘅沙漠及荒野,更勇奪比賽嘅季軍!

任職中電見習工程師嘅IVE電機工程高級文憑畢業生劉藝雄,係車隊電機組成員之一,佢分享話賽事期間隊員面對唔少挑戰,例如有一日比賽時,一度因為太陽能板發生故障收集唔到足夠電量,最後要通宵搶修先解決到問題。唔單止咁,平時隊員要喺沙漠公路上駕駛、為太陽能車充電及部署策略提升車速,仲要每晚都喺荒野露營,爭取時間幫太陽能車檢修。

公關姊妹話,今屆係IVE工程太陽能車隊第4次參賽,憑多年累積嘅比賽經驗,加上部車勁,所以取得歷年參賽以來嘅最好成績,力壓多間世界著名大學,好似英國劍橋大學、美國柏克萊加州大學等院校嘅車隊。黛安認為,車隊隊員咁落心落力做好個比賽,今次得獎係實至名歸,再次恭喜佢哋!

撰文: 黛安 消息特靈八卦公關
欄名: 八卦名利場