佘詩曼（阿佘）有份出演嘅內地真人騷《看我的生活》自播出後受到不少網友關注，近期播出集數入面，就搵咗台灣男星王大陸約阿佘去主題樂園玩，點知佢口沒遮攔，多次講中女人死穴年紀問題，激到阿佘發脾氣黑晒面，最後仲嬲到震咁走開添！
（圖片：佘詩曼IG）
王大陸一開始為約會悉心準備，安排好晒行程路線，計劃去深圳世界之窗，又好識做買定奶茶氹阿余，原本大家都開開心心咁玩咗幾個機動遊戲，有講有笑，氣氛唔錯。
（圖片：《看我的生活》影片截圖）
一開始都玩得幾開心（圖片：《看我的生活》影片截圖）
喺等奶茶途中佢哋坐埋一邊傾計，阿佘話自己驚玩太刺激嘅機動遊戲，又讚王大陸夠大膽。今年29歲嘅王大陸就口快快講：「但係⋯年紀越大嘅時候就會…就開始怕死。」現年45歲嘅阿佘即時面色大變，睥實對方，無言數秒後質問佢係咪嘲笑自己年紀大，仲激到坐埋一邊：「我最唔鍾意人家講年紀嘅問題啦。」當下嚇到王大陸腳都震埋，急忙安撫阿佘，解釋去樂園係有童心嘅象徵，絕對唔係有意講年紀問題，佢先接受坐番原本位置。
講到年齡阿佘即刻唔鍾意（圖片：《看我的生活》影片截圖）
睥實王大陸（圖片：《看我的生活》影片截圖）
二人之後轉話題到家庭方面，王大陸指31歲嘅家姐已結婚生子，阿佘問佢：「咁台灣流行早婚定晚婚？」他說：「正常啦，都可以。」隨即反問阿佘：「你哋呢？」但未等阿佘開口回答，佢已經忍唔住脫口而出，說：「晚婚！」當堂令阿佘面色一沉，並轉頭問節目組：「呢個人做咩事啊？你搵咩人約我出去呀，淨係會激嬲人！」阿佘即時戴番個口罩想起身走人，嚇得王大陸立即認錯：「姐姐我錯啦，我講錯啦。」其後先平息到阿佘怒氣，繼續坐定定錄節目。
王大陸轉過頭就話阿佘晚婚（圖片：《看我的生活》影片截圖）
阿佘嬲到震（圖片：《看我的生活》影片截圖）
個樣即時勁冇癮（圖片：《看我的生活》影片截圖）
買完飲品返上車，王大陸繼續安撫阿佘，又承諾一陣間會幫手擔傘賠罪，之後佘詩曼講笑咁話：「你唔使扮啦，成日得罪我，半個鐘之內得罪兩次，到五次就要懲罰啦。」其實佢哋一來一往嘅互動都幾搞笑，相信多數係節目效果居多嘅！
（圖片：《看我的生活》影片截圖）
好在王大陸最後都成功氹到阿佘笑番（圖片：《看我的生活》影片截圖）
撰文：羅慧怡
責任編輯：楊安莉