《飛虎3》下月開拍 吳卓羲大爆有視帝加盟

吳卓羲（Ron）昨日到電台宣傳劇集《飛虎之雷霆極戰》，他透露下月初開拍《飛虎3》，屆時會有幾位視帝級人馬加盟，而女演員更會大換血，Ron表示︰「女演員有啲我都未合作過。」

《飛虎之雷霆極戰》將於下周大結局，吳卓羲透露原定三、四月開拍《飛虎3》，但受疫情影響，所以延至下月初開鏡。他說︰「《飛虎2》之前內地已經播晒，收視非常好，所以再拍第三輯。今次加咗好多新演員，會有幾個視帝喺裏面，其中一個係郭晉安，女演員全部都換晒新嘅。」Ron十分期待跟老拍檔苗僑偉（三哥）及黃宗澤（Bosco）一同拍劇，又指在這個時勢有工開，已十分感恩。

Ron劇透自己在新一輯故事中不再演飛虎︰「新劇係另一個故仔，我因為私人事無做飛虎，知道依家只係寫咗劇本大綱，好多都未定。」至於跟新加盟的女演員合作，擔心傳緋聞？Ron笑指︰「仲細咩，我哋呢啲無人傳㗎喇，專注喺套劇啦，睇劇唔好睇緋聞。」但有傳黃宗澤追求緋聞女友陳嘉桓的好姊妹余香凝？Ron表示有看報道︰「我見到Bosco回應，佢話係監生砌，又話背脊骨落。我信佢話無就無，佢邊咁得閒，拍戲咁忙，開完工又要去蠔吧，邊有時間。」

慨嘆緣份未到

另外，Ron主動恭喜馬國明與湯洛雯拍拖，問他是否恨拍拖？Ron笑說︰「恨又點，有先得㗎，唔係話有就有。」對於馬明與靚湯在不同廠拍劇仍能撻着，Ron說：「所以覺得馬明叻仔，緣份無得講，大家識咗咁多年，戥佢開心，佢都話自己年紀唔細，佢大我少少。（你年紀都唔細？）咁我仲係拼搏期。（都可以拍拖？）唉，緣份未到，唔好再挑起我啲傷心事，點去渴望都無用，我都想。」

編輯︰李潔盈

美術︰梁政敏

撰文、攝影︰倪小珊