去年4月黃心穎因偷食人夫許志安，搞到人財兩失，無論劇集定係男友全由湯洛雯接收！黃心穎同湯洛雯合演過《丫鬟大聯盟》，感情都幾好，估唔到二人睇男人嘅眼光都差唔多，黃心穎知道舊愛馬國明同湯洛雯撻着之後表示：「祝福佢身體健康、平安。佢私人嘅事留番畀佢回應。」
（網上圖片）
其實圈中亦有唔少藝人同閨密嘅前度一齊，正所謂再見亦是朋友，分開咗就一切俱往矣，唔應該干涉對方嘅感情生活。
（李施嬅IG）
好似胡杏兒同李施嬅咁，唔介意閨密同過自己老公拍拖，結婚仲請對方做姊妹，兩個都好大方！胡杏兒曾大方表示：「事情都已經係過去式，佢哋兩人都唔介意，點解我會介意呢段過去嘅事情呢？」李施嬅亦覺二人天生一對，佢同前度分咗手，姊妹同前度拍拖，佢嘅身份就係「無謂人」，大家都無謂再提起佢喇。
（網上圖片）
不過又唔係人人可以做到唔介意，好似鄧紫棋（G.E.M.）咁，就為咗有米造型師男友Mark放棄同JW（王灝兒）10年友情，JW曾公開承認與G.E.M.極少聯絡，依家連社交網都互相取消關注。其實G.E.M.係透過JW認識Mark，以前三人仲會同場出席聚會，可惜往事只能回味。
此情不再。（李靜儀IG）
另外組合Super Girls成員陳穎欣（Yanny）被指介入李靜儀（Heidi）同有米音樂監製陳考威（Gareth）嘅戀情，Heidi不滿舊愛分手冇耐就同隊員Yanny相戀，嬲到即時取消關注Yanny社交網。即使二人依家已經互相關注番對方，但就算組合一齊出席活動，兩女都表現得「面阻阻」。
Leanne（左）與Evelyn（東星娛樂）
樂隊Mr.鼓手Tom（杜志烜）2011年與藝人蔡穎恩（Evelyn）分手幾個月，火速撻着舊愛好姊妹「陽光妹」何思諺（Leanne），拍拖兩個月就奉子成婚，當時Evelyn話自己有時間都希望見啲「想見」嘅朋友，表明同Leanne再見不是朋友。
撰文：黃蘊姿