舊年全城潮玩「童顏」、「變老」手機App嘅變面濾鏡，個個都開心Share自己嘅「另一面」，「奇幻逆緣」熱潮退卻，最近又流行「扮女人」熱潮，唔少男藝人都趕上潮流，用App將自己變成女人樣，有人被大讚靚過真女人，有人就為大家帶嚟唔少「驚」喜。
有網民話見到呢張相就知李璨琛網紅囡囡Lucy大個會變咩樣！（李璨琛IG）
昨日李璨琛、林盛斌（Bob）及張振朗分別喺IG貼出自己嘅「女人」樣，李璨琛貼出長曲髮照，寫上古天樂首《今期流行》歌詞「今期流行流行椎名林檎」，不過有朋友就指佢似鄭秀文，而陳敏之亦留言：「喂呀！又幾靚喎衰鬼！」好多留言都大讚佢索，話佢變咗做女人真係一啲違和感都冇呀！
靚到打咗個冷震。（張振朗IG）
不過講到「變女仔」最出色嘅莫過於張振朗，佢喺IG貼出佢嘅變面照，留言：「可否緊緊抱實我？應承我唔準unfollow我！」胡定欣鬼馬問：「你無事呀嘛？工作壓力太大？」有網民覺得他的照片有些似衛詩雅，又有人覺得他似湯洛雯同林淑敏。佢仲玩上癮連出兩個Post，雖然係幾靚而且一啲都睇唔出係假相，不過一諗到佢係張振朗, 就有一種莫名其妙嘅唔舒服感覺！
呢張好似「大小姐」林淑敏！（張振朗IG）
要數最「引人犯罪」嘅就莫過於阿Bob，佢揀咗一張泳池邊留影嘅相，似足平日啲港女「Staycation」嘅相，阿Bob留言：「終於有人整到一張我滿意嘅，其餘嗰啲都key得好差……」
（Bob IG）
此Post一出即引嚟唔少藝人留意，郭子豪回覆：「我本身已經戒咗粗口……」，馮盈盈讚阿Bob好索，劉佩玥就話要call降魔的降咗佢，最慘嘅莫過於Bob嫂，事關好多人留言話Bob呢張相同佢太太Pearl好似樣，Bob今日話Pearl受咗好大嘅打擊，要頹廢一日，非常爆笑！
Bob嫂好慘呀……（Bob IG）
雖然呢個App依家勁Hit，不過一向唔趕潮流嘅馬國明就「不在狀況」。日前本報記者Send咗一張佢變靚女嘅相畀佢本人，馬明竟然反問係邊個嚟：「梗係唔係啦，擺到明女仔嚟啦，點會係我嚟。」貫徹番佢嘅天然呆，反應非常Cute Cute！睇嚟靚湯繼教男友玩IG之後，要教吓佢玩變面App，等佢可以趕上潮流！
好優雅～（馬國明微博改圖）
（馬國明微博改圖）
（網上圖片）
同場加映，鄭伊健變咗女仔之後同蔡卓妍（阿Sa）做咗Twins。
撰文：黃蘊姿
每朝索取《晴報》：精明生活．健康家庭．開心娛樂