最近兩集ViuTV節目《晚吹—又要威又要戴頭盔》請來4位僱傭中介做嘉賓，大爆僱主、家傭及中介三方之間的二三事，例如僱主及家傭各自的要求、投訴，有中介更爆料曾有僱主安排露台、甚至廚房地下畀家傭瞓。
（圖片：ViuTV影片截圖）
相關新聞：《晚吹》空姐空少大爆機艙最污糟位 收餐遇「暖蘋果汁」真相勁嘔心
四位僱傭中介表示他們都會飛到菲律賓或印尼親自揀人，提到聘請要求，中介就提到不介意工人姐姐五官靚，但唔可以貪靚：「我哋最主要睇下姐姐有冇紋身，因為有啲僱主唔鍾意、身體有冇缺憾同有冇皮膚病等。」不過當主持問到僱主會否對家傭有甚麼要求時，有中介指：「有啲太太唔鍾意工人太靚」，但亦有僱主要求「靚姐姐」，原因是因為「小朋友成日對住」。有中介更提到曾有僱主向他們提奇怪要求：「佢畀咗個年齡範圍，指明要某個生肖及星座。」
（圖片：ViuTV影片截圖）
（圖片：ViuTV影片截圖）
除了有僱主對工人姐姐有要求外，中介更爆料指有家傭亦會揀工做，他說：「特別係喺香港快完約個啲，要求仲多過僱主，有啲姐姐講到明太太喺屋企唔做、有老人家唔做、有兩個工人唔做、冇自己房唔做、冇禮拜日放假唔做、小朋友細過6歲唔做、有貓狗唔做，而家玩到見完你返去等Waiting list都未夠，試過有姐姐話要去家訪，睇下僱主屋企環境如何再決定做唔做，呢啲我通常都唔會要。」
（圖片：ViuTV影片截圖）
而講到家傭對僱主會有甚麼投訴，他們就表示曾有人投訴食物供應不足、休息時間不足8小時、甚至投訴僱主英文唔好。但就有中介表示見過有家傭喺夏天爛手指，問咗幾次佢都以「好需要呢份工、無問題」為由而唔敢投訴，「原來僱主一家六口嘅衣服，由牛仔褲到內衣、床單窗廉都要佢用手洗 ，我問僱主時，佢仲話『請咗工人當然用手洗啦』。」
（圖片：ViuTV影片截圖）
（圖片：ViuTV影片截圖）
提到最壞嘅住屋情況，中介表示：「試過聽過有工人瞓喺露台，衫係上面晾住，瞓喺洗衣機前面，同返個僱主講，結果一兩個月後就炒咗個姐姐，因為無其他位可以畀佢瞓。」有另一位中介就提到：「2000呎屋，有房多，但工人要喺廚房地下瞓，或者喺廚房放罐頭個櫃，另一格係佢張床。」更有中介聽過有工人姐姐要瞓樓梯底。
（圖片：ViuTV影片截圖）
（圖片：ViuTV影片截圖）
（圖片：ViuTV影片截圖）
不過提到最豪華的住所，中介指：「試過有姐姐同我講佢住貝沙灣，有獨立房同洗手間，仲要對住個海。」另一位亦表示：「一間山頂獨立屋，四個姐姐有兩個工人房，仲有個廳畀佢哋一齊住。」
（圖片：ViuTV影片截圖）
撰文：林惠珊
責任編輯：楊安莉