【37歲靚媽】孫慧雪曬18歲素顏舊相自讚可愛 被網民指同依家唔同樣 佢解釋...

早前孫慧雪喺劇集《機場特警》飾演人妻引起網民激烈討論，大家紛紛讚佢明明已經37歲，但個樣仲好似20幾歲嘅少女咁清純，好靚女。琴晚，孫慧雪上載咗張18歲嘅舊相，話：「俾（畀）我搵到張18歲卜卜脆嘅舊照！雖然唔係咩靚女，唔⋯⋯都勉強可以話幾可愛呀！」

{{hket:inline-image name="17.jpg"}}{{/hket:inline-image}}

(TVB電視截圖)

▼邊度似37歲？

{{hket:inline-image name="18.jpg"}}{{/hket:inline-image}}

(孫慧雪instagram圖片)

一班網民紛紛留言，唔少人指孫慧雪19年前同依家個樣好唔同：「完全唔似你囉」、「look so different」、「做咩依家靚咗咁多？兩個人咁樣喎」、「只能說你女大18變」等等，孫慧雪好大方咁回應，話自己覺得以前同依家個樣冇分別。之後孫慧雪再補充，指當年佢完全素顏，同埋都過咗差唔多20年，變咗樣好正常。有網民話佢個頭好油，佢解釋：「去咗唔知玩咩船，所以成個頭濕晒。」唔係有頭油，佢仲覺得以前比依家嘅自己靚啲。有粉絲留言支持孫慧雪：「只係素顏同化妝嘅分別，唔識就少句啦啲人。」得到孫慧雪留言讚好。其實孫慧雪18歲嗰陣臉尖尖，幾可愛，都有唔少網民讚佢當年個樣好青澀、清純，似足韓星等。

{{hket:inline-image name="12.jpg"}}{{/hket:inline-image}}

(孫慧雪instagram圖片)

{{hket:inline-image name="15.jpg"}}{{/hket:inline-image}}

(孫慧雪instagram圖片)

好多人都話孫慧雪依家靚好多，但係佢自己就話肥咗就真。佢解釋自己喺疫情期間忍唔到口，成日食燕窩、花膠、飲珍珠奶茶，食到肥咗，腰間多咗啲鬼崇肉。從佢社交平台可見，佢依家正苦練緊廚藝，又整蛋糕，又整曲奇，難怪發福啦。

▼一打開佢IG，全部都係嘢食

{{hket:inline-image name="16.jpg"}}{{/hket:inline-image}}

(孫慧雪instagram圖片)

孫慧雪話依家會開始恢復減肥計劃，除咗食減肥產品，仲係咁把握開工前嘅時間去做健身。只見短片裡面嘅佢好努力咁做，獲教練大讚夠勤力，佢留言：「唔可以再懶啦～教練話我好捱得，其實我食得太有罪咎感而已。」佢仲讚教練好好人又不失嚴厲，之前生完BB都係搵佢健身，半個月就減咗20磅，今次搵埋另一個人幫自己指導動作同拉筋，希望7月生日之前可以減多10磅，最後佢自我鼓勵：「希望做到最好，希望愈來愈靚，唔好放棄自己。」

到咗7月，孫慧雪就踏入38歲，佢曾經講過如果40歲唔走樣，會考慮再推出寫真，希望到時有廣告、美容贊助，令她變得更靚。曾經被傳媒問到老公鍾意佢微胖定標準？佢就好甜咁話：「老公話，『無論人點睇你都好，你喺我同個仔心目中，都係最靚。』」 閃盲大家對眼！

{{hket:inline-image name="13.jpg"}}{{/hket:inline-image}}

(孫慧雪instagram短片截圖)

{{hket:inline-image name="14.jpg"}}{{/hket:inline-image}}

(孫慧雪instagram短片截圖)

撰文：張芷晴
責任編輯：楊安莉