疫情下搶閘開騷試水溫 雷有輝Rock爆戲曲中心

太極樂隊主音雷有輝（Patrick）將於下月踏上西九戲曲中心舞台，舉行兩場個唱，將音樂送給受疫情影響的香港人。他將是首位在戲曲中心開騷的流行歌手，他笑說︰「我唔識唱粵劇，睇下家英哥（羅家英）教唔教我啦！」

原定在四月開騷的雷有輝，因疫情拖累數度延期︰「我百無聊賴留喺屋企，突然有日老闆打畀我話改喺八月做，我即刻call齊團隊開工。」近日仍有零聲新冠肺炎確診個案，令演唱會蒙上陰霾，Patrick說︰「我唔理得咁多啦，因為我哋無Plan B，當真咁準備！今次個唱叫《PAT Music Over Rainbow》，相信疫情好快過去，好似雨後陽光咁。」

Patrick屆時為入場樂迷預備口罩、探熱裝置等︰「我哋可能係疫情後第一個演唱會，我亦係西九戲曲中心第一個舉行流行音樂會嘅歌手。好多朋友問我會唔會唱粵劇？我心諗咪黐綫啦，雖然粵劇有時都好rock，但係我唔識㗎。」

半年零收入

Patrick今次單飛開騷，他笑言仍未習慣︰「以前見親記者都係六個人（太極），唔識答會有隊友幫口，依家原來辛苦咗六倍，今次都搵咗Joey Tang（鄧建明）做音樂總監。」Patrick又透露，年尾太極將重組舉行成軍35周年演唱會︰「12月我哋會搞一個戶外騷，今次佢哋（隊友）叫我出嚟試下水溫，同樂迷玩得慶慶哋，再去12月個音樂會，用音樂為大家打氣！」

另外，提到過去半年的疫情，Patrick坦言拉近與家人的距離︰「疫情最嚴重嗰陣，街都無得出，全部工作取消，搞到零收入！但多咗時間陪太太，佢煮一餐、我整一餐咁增進感情。」

撰文︰Steven

編輯︰李潔盈

美術︰梁政敏

場地︰台北．寬巷子@海港城