【搏擊世界冠軍】周比利真功夫與成龍洪金寶對打 61歲寶刀未老培養下一代拳王

現年61歲嘅周比利外號「老虎」 ,世界拳王及動作片演員，外號「老虎」，1982年奪得加拿大輕量級自由搏擊冠軍。他的職業戰績43勝8負，31場技術性擊倒（KO），且從未被人KO，於1985年獲得WKA自由搏擊世界冠軍。

（網上圖片）

不過原來周比利自小就被家人當女仔養，因為當時醫生同佢阿媽講，生出嚟都唔會長命，所以自細屋企對佢呵護備至。

直到11歲，周比利對打拳產生濃厚興趣，加上遇到叔叔一位讀營養學嘅同學，糾正他們一家的錯誤觀念，話唔可以當佢死硬咁養，令佢成個身體有好大改變：「依家發育，要畀啲有營養嘅嘢佢食。要每日食麥皮、芝士、麵包兼飲鮮奶，強化佢身體同做運動。」就係咁周比利開始跟阿哥練拳，加上發育又食得好，自信心返晒嚟。

（網上圖片）

之後，周比利拜師李鵬師傅，全力打擂台競技，對手全部係比自己高大嘅外國人，但打自由搏擊未輸過。

周比利喺《賭俠2之上海灘賭聖》中同周星馳嘅對手戲都好突出。（《賭俠2之上海灘賭聖》截圖）

後來武打片流行，洪金寶邀周比利拍戲，於是佢留咗喺香港發展，結果闖出另一番事業。喺影圈發展近二十年，拍過數十部電影，之後千禧年代息影。2003年以45歲之高齡復出拳賽，2007年5月30日，於澳門舉辦的「國際泰拳金腰帶澳門慈善大賽」KO泰國南部拳王拿差聯，奪得金腰帶殊榮。 

（周比利IG）

依家嘅周比利依然寶刀未老，前年仲出山再拍電影《黃金兄弟》，一啲都唔輸年輕人。

周比利（右二）身形高大仲要勁弗，一啲都唔似60歲。（周比利IG）

鐵漢柔情嘅周比利同太太Amy形影不離，去邊度都要帶埋老婆。雖然二人膝下無兒，但佢就好享受兩公婆周圍去嘅二人世界。周比利話後生時唔得閒，又要打拳、又要拍戲，承擔唔到責任。到後來想過要，都過咗生小朋友嘅時段，不過佢一啲都唔覺得係遺憾。

（周比利IG）

桃李滿門嘅周比利開設拳館多年，唔少藝人都係佢嘅門生。周比利不時從加拿大返港教拳，培養下一代拳王，做另類嘅承傳。

撰文：黃蘊姿