【聲明】港生活網站並無進行電話推廣活動

孖龔嘉欣打戲連場 黎耀祥︰我變咗武打明星

發佈時間: 2020/07/03

無綫劇集《殺手》近日熱播,前晚第三集黎耀祥(祥仔)與龔嘉欣飾演的「Dark Angel」大戰連場,嘉欣的Punk妹造型夠突破,二人成功擦出火花。祥仔昨晚接受《晴報》訪問時,戲言已成為武打明星,更大讚拍檔︰「嘉欣好專業又吃得苦,我哋對打都無遷就佢!」

《殺手》昨晚已播出四集,雖然有指部分劇情和角色設定抄襲外語片及本地小說,但其實該劇的故事天馬行空,配上久未有新劇推出的祥仔、陳豪及李佳芯兩視帝一視后陣容,劇集在網上掀起不少話題。龔嘉欣飾演的癲喪殺手「Dark Angel」,前晚個人表演勁搶Fo,劇情描述黎耀祥飾演的「過氣殺手」閻武,欠下不少債項,被要求追收另一欠債人債項來抵銷,豈料撞正龔嘉欣有殺人任務,更連累祥仔收數不成,結果二人大打出手,期間祥仔雙手誤觸對方胸部,嘉欣亮出雙刀專攻對方下體,畫面令觀眾睇得過癮。

嘆久未演市井之徒

昨晚祥仔受訪時大讚嘉欣專業︰「佢好好,又吃得苦,着住啲戲服要打到咁,我都無遷就佢。齣劇係八月開拍,天氣又熱好辛苦!」提到他前晚的「摸胸戲」NG了30次,祥仔笑言︰「梗係無咁誇張,不過都拍咗好多次,個Shot剪得快,電視播出嚟唔太覺(摸胸)!(你的市井形象觀眾受落?)我都好耐無做呢種角色,今次個人物仲衰過98年電影《生化壽屍》個駒哥!」

從演至今打得最甘

劇中扮演過氣殺手,祥仔戲言今次是從演以來打得最多的一次︰「好多人話唔知我咁打得,今次入行以嚟打得最多,好似變咗武打明星!」他又感謝《殺手》監製陳維冠︰「演員組合新鮮,劇種、角色設定都唔錯,題材天馬行空、莊諧並重,演員士氣好好!」

此外,昨晚龔嘉欣在IG發布第三集的動作場面片段,並留言︰「兩個通宵換來的一場動作場面,筋疲力盡,傷痕纍纍,但我樂在其中,因為成就了全新的我,我要你記得我!」

至於粉絲都大讚祥仔演市井之徒有血有肉,有觀眾更指龔嘉欣有力在年尾爭奪「我最喜愛的女角色」。

撰文︰Steven

編輯︰黃寶恩

美術︰Simon

孖龔嘉欣打戲連場 黎耀祥︰我變咗武打明星

祥仔與嘉欣不打不相識,其後兩人成為拍檔,更會有曖昧關係。

孖龔嘉欣打戲連場 黎耀祥︰我變咗武打明星

龔嘉欣在《殺手》的造型破格,性格狼死又癲喪。(IG截圖)

孖龔嘉欣打戲連場 黎耀祥︰我變咗武打明星

陳豪(左二)和祥仔(右二)繼13年的《法外風雲》後再合作,二人既會大放笑彈,又有打鬥場面。