【TVB電視城靈異事件】吳卓羲拍戲遇怪事凌晨4點撞鬼 目睹「小朋友」穿門而入嚇餐死

邵氏特別節目《Tiger's talk》話題性十足，成班嘉賓馬德鐘、苗僑偉（三哥）、黃宗澤（Bosco）同吳卓羲（Ron）講得夠放、夠搞笑，所以觀眾都好鐘意睇。早前有一集他們大談靈異經歷，電視城一向多鬼故傳聞，吳卓羲就分享早年拍劇，試過有次零晨4點見到一個奇怪「小朋友」出沒，嚇到佢勁心寒！

相關新聞：【飛虎之雷霆極戰】馬國明自爆曾有女星主動畀房號 「我冇去因怕被人捉黃腳雞」

{{hket:inline-image name="sss.jpg"}}{{/hket:inline-image}}

（圖片：影片截圖）

吳卓羲當時拍嘅劇叫《英雄•刀•少年》，因為住得遠，一來一回浪費時間，加上趕拍劇份，於是佢就選擇到男藝員休息室瞓教。大約凌晨三、四點時，吳卓羲表示有怪事發生：「有時個人太累反而瞓唔到，我望住門口個位置，突然間我見到個『小朋友』，慢慢行入嚟。但嗰度門係冇開到，係閂緊咗。」佢即時覺得好驚，因為當時公司有規定，16歲以下演員，晚上11點後必定要離開TVB。吳卓羲即時問身邊嘅演員同事，對方都表示睇到該「小朋友」，兩個人勁驚，最後閉上眼睛，要倒數三聲一齊跑岀休息室「避難」！

{{hket:inline-image name="63.jpg"}}{{/hket:inline-image}}

（圖片：影片截圖）

{{hket:inline-image name="t2.jpg"}}{{/hket:inline-image}}

（圖片：影片截圖）

而另一次，吳卓羲喺同一間休息瞓教，瞓喺佢身邊嘅演員突然間坐起身，莫名其妙喃喃自語，但發岀嘅聲音，絕對唔係佢原本把聲，搞到吳卓羲好無奈：「我嗰時心諗，點呀大佬，我都係嚟拍戲啫。」

{{hket:inline-image name="96.jpg"}}{{/hket:inline-image}}

（圖片：影片截圖）

而馬來西亞同樣出名多古靈精怪事，Bosco試過有次酒店住尾房唔太愉快，而三哥更大白天撞鬼，都咪話唔驚！

{{hket:inline-image name="3r.jpg"}}{{/hket:inline-image}}

（圖片：影片截圖）

Bosco有次去馬拉嘅怡保工作，當時係入住酒店尾房。Bosco插入房卡後其中一盞燈一直未有着燈，當地保鏢察覺有異樣，只站在房門不肯內進。Bosco毫不知情，就不以為然地入房，隨即感到周身唔聚財。直到佢行近床邊時，本身開唔著的房燈卻突然發光，嚇得Bosco立即離開房間，跟站在門口嘅保鏢四目交投，最後Bosco匆忙間遺下了行李！

{{hket:inline-image name="42.jpg"}}{{/hket:inline-image}}

（圖片：影片截圖）

而三哥的靈異經歷就更「猛」，由於前一晚拍攝通宵戲好累，三哥一到馬拉酒店就補眠，然而廁所不斷傳來怪聲，讓他無法入睡。至下午四時，三哥突然被黑影壓住，動彈不得，隨即嚇到他當晚要同保鏢一齊瞓壯膽。

{{hket:inline-image name="74.jpg"}}{{/hket:inline-image}}

（圖片：影片截圖）

點知更可怕嘅事就發生，三哥瞓到第二朝早上7點，發現保鏢不知所蹤，一轉身想起身嘅時候，又被鬼壓住動彈不得。而今次佢更見到個衣衫襤褸嘅伯伯，蹲在原先保鏢瞓嘅位置望住佢！三哥嚇到心中唸唸有詞，過咗陣先郁到，其後佢打畀保鏢，先知原來對方清晨5點幾，亦遇上怪事，被無形力量壓到小腿紅腫，好似豬蹄咁，認真誇張！

{{hket:inline-image name="764.jpg"}}{{/hket:inline-image}}

（圖片：影片截圖）

撰文：羅慧怡

責任編輯：楊安莉 

每朝索取《晴報》：精明生活．健康家庭．開心娛樂