陳偉霆（William）自從轉戰大陸市場之後撈到風生水起，儲落一大班迷妹為佢瘋狂。大陸疫情紓緩之後，William已經率先上去開工拍劇，收重金出演《斛珠夫人》。
（《認真的嘎嘎們》微博）
除咗影視作品之外，其他工作都一浪接一浪，近日擔任選秀真人騷《認真的嘎嘎們》嘅導師，最近播出嘅一集William仲意外成為焦點，節目效果一流呀！
（《認真的嘎嘎們》微博）
節目中素人學員出招為博一眾導師的認同，其中一位學員馬旭東就搞搞新意思，喺過山車上面做棟篤笑。陳偉霆就被安排坐喺佢身邊，二人身後就係另外兩位導師，張偉同何炅，陳偉霆表示自己唔怕坐過山車，睇落非常霸氣。
（《認真的嘎嘎們》微博）
不過好快William就已經「露底」，霸氣盡失，一開車William已經好不安咁向後望，好似想搵路走咁，去到半空嘅時候，William形象瞬間崩壞，表情管理完全失控，分唔到佢係笑、驚定係喊，有幾吓仲好似想嘔咁款！
（《認真的嘎嘎們》微博）
（《認真的嘎嘎們》微博）
不過身邊嘅學員馬旭東仲好冷靜咁講笑話：「開着這輛過山車，完全沒有車能趕得上你，人生就走向了巔峰。」結束嘅時候馬旭東仲問William：「是不是被操縱感十足？有一種被拋棄的感覺」，但William完全畀唔到反應，驚魂未定，二人嘅強烈對比更顯滑稽。
（《認真的嘎嘎們》微博）
（《認真的嘎嘎們》微博）
其實William開始嘅時候不停深呼吸，仲極力保持微笑，但當過山車向下衝有離心力嘅時候，佢都係選擇咗匿埋雙眼，表情完全「Hold唔住」。之後William仲回頭同另一導師張偉講「這台車好快，你們居然沒事」，非常惹笑。好多大陸Fans話不慎曝露弱點嘅William好可愛，大讚「飽飽還是帥」，仲話佢真情流露令一眾迷妹好想攬住佢嚟呵番，「我見猶憐」咁話。
勁過當年一劇成名嘅《古劍奇譚》中大師兄陵越。（網上圖片）
撰文：黃蘊姿