【保就業名單千奇百趣】有間資助額得$1XXX？老和尚究竟有乜秘方？

政府推出嘅「保就業」計劃第三批名單已於日前公布，暫時攞到最多補貼嘅係中原地產，資助額達1.15億港元！對打工仔同老闆嚟講，最關心當然係資助嘅數目啦，但原來成份名單入面都有唔少千奇百趣嘅數據同資料，值得攞出嚟分享。

最低金額係幾多？

暫時為止嘅最高金額就係人都知，但最低金額大家又知唔知係幾多？原來攞到最低金額嘅係「一間本地有限公司」（A LOCAL COMPANY LIMITED），承諾受薪僱員人數係2人。而佢獲得嘅金額係1,950港元！你無睇錯，真係連2,000蚊都無！呢個數莫講話幫助僱員、幫補僱主，衰啲講連餐貴少少嘅晚飯都未必夠俾！令人好奇呢「一間本地有限公司」業務係乜，點解咁少人工都要申請資助？

醫院都要靠資助？

疫情之下，旅遊業、飲食業、零售業等都成為重災區，但最估唔到係有唔少醫院都榜上有名！可能大家會問：「有疫症喎，唔係應該多咗人求醫咩？」原來正正相反，正因為疫情，唔少市民都對醫院敬而遠之，始終嗰度都係感染病毒嘅高危地方；另一個令人意想不到嘅原因係4大防疫措施（戴口罩、勤洗手、嚴防廁、保持社交距離），由於幾乎人人都嚴守，令感染一般季節性流感嘅機會都大大降低，間接令去醫院求診嘅人數都大幅減少！

{{hket:inline-image name="0708WLfeaturepageOK2.jpg"}}{{/hket:inline-image}}

▲疫情下私家醫院生意非但無增加，仲因為市民更注重衛生，少咗好多人因感冒等小病求診。

一人公司多籮籮？

名單上發現唔少公司嘅「承諾受薪僱員人數」都係1人，呢個情況反映咗幾個可能：第一，唔少公司原來都擁有一個可以一腳踢嘅萬能員工；第二，唔少公司可能係請Part-time、Freelance或外判為主；第三，喺香港開一間公司原來唔係想像中咁難。

另類公司搞邊科？

名單中有唔少大家熟悉嘅名字，例如麥當勞叔叔之家、恆香老餅家等；但同時亦見到唔少聽都未聽過嘅公司名，有啲仲頗有玩味同創意，例如：

‧壹間好公司有限公司（硬銷夠直接，但公司又公司，會唔會噚氣咗啲？）
‧一雙小手有限公司（一睇個名，唔知點解已Feel到一種幸福感。雖然可能係我諗多咗。）
‧老和尚秘方有限公司（到底老和尚有咩秘方？條秘方又用喺邊方面？真係令人耐人尋味！）
‧榴槤新領域有限公司（呢間公司名唔只有畫面，直頭覺得有陣味飄出嚟！）

撰文：何本輝

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/