現年53歲的林利在無綫劇集《殺手》中, 客串演台灣黑幫頭目「柯正雄」及分飾整容後的丁一虎，一出場非常有氣勢，可惜僅數集就已被喬星(陳豪飾)及閻武（黎耀祥飾）合力殺死。劇中的他有野心，為上位用盡手段，但其實現實的他出道38年、經歷患病等，現在卻坦言：「而家過嘅生活比較自私，最想得到嘅係健康，因為而家對所謂名利、掌聲、獎盃都冇興趣，想要回歸平淡生活。」
（圖片：《殺手》劇照）
於《殺手》中分飾兩角。（圖片：《殺手》電視截圖）
林利劇中有不少打鬥場口，他憶起當時因大腸癌剛完成切除腫瘤手術，在體力透支下曾兩度入院，他解釋角色在拍攝前一年已答應好監製：「佢話有個角色好適合你，不過搵親我拍個角色唔係黑就係白，好濃味，就唔會搵我拍小白臉。或者我個樣比較cool，可能佢哋覺得我都係適合演呢啲。」他又笑言自己都想試拍《愛回家》的角色：「都想做啲舒服啲嘅角色。」
林利於劇中有不少打鬥場口。（圖片：《殺手》電視截圖）
（圖片：《殺手》劇照）
因健康理由提早解約
近幾年林利曾簽約邵氏，更有份參演上年播出的《鐵探》，但原來他現以健康理由而提早解約，「唔想太辛苦，想畀返多啲時間自己同家庭、陪阿媽。其實之前都做咗30幾年，而家最想得到嘅係健康，唔想再捱，因為而家對所謂名利、掌聲、獎盃都冇咩興趣，想要回歸平淡生活。」
（圖片：《晴報》黃紫維攝）
在2017年，林利確診患大腸癌第三期，在接受腫瘤切除手術後，慢慢康復。他更表示患病後沒立即告知家人：「我冇同屋企人講，係臨開刀之前一日先同細佬講，佢哋都嚟唔切憂愁。我係一個好鍾意自己解決問題嘅人，唔會煩人。做完手術仲去美加唱歌表演。」
（圖片：《晴報》黃紫維攝）
他坦言今次經歷是心態的轉捩點：「注意多咗飲食，醫生有叫我做化療，但我都冇做，因為我覺得係靠自己情緒。又唔需要做太多運動，慢跑就可以，最緊要係心態， 因為我係一個好鍾意家嘅人，而家有太太同媽媽，個心境好平靜，所以工作量減少，以前麻木咁追求，唔知追緊咩。」
（圖片：林利facebook）
除了心態，林利的身體狀況亦因曾患癌而改變：「腸變得好敏感，好容易去廁所，食嘢要好小心，唔可以大魚大肉。其實我食好多餐，可惜肥唔返，想增磅都增唔到，可能元氣未返。」
林利與母親感情很好。（圖片：林利facebook）
曾到台灣發展
林利在1982年參加第一屆新秀歌唱大賽入行，之後和胡渭康及孫明光組成「香港小虎隊」並推出唱片，紅極一時，於1985年解散。組合解散後，他離開香港到台灣發展。提到當時到台發展的契機：「好鍾意台灣，就孭咗個袋，1989年，我拎住卡式錄音帶，膽粗粗去台灣唱片公司面試。」
林利曾和胡渭康、孫明光組成「香港小虎隊」。（網上短片）
（圖片：林利facebook）
居台多年，他直言台灣的環境更適合自己：「香港同台灣完全唔同，台灣節奏慢啲、地方大啲，人冇咁躁，生活平淡同舒服。」早前於疫情爆發時，他返港陪母親，在7月頭已返到台灣接受隔離檢疫。「剛爆發時係台灣，趕住返黎，因為唔放心媽媽一個人，都返咗嚟差唔多5個月。」林利十分孝順，與母親關係很好。「媽好明事理，對兩兄弟要求唔多。因為爸爸早走，佢一手湊大我哋，關係好好。」
（圖片：林利facebook）
回港時常伴母親左右。（圖片：林利facebook）
因拍劇喜獲情緣
2018年尾，林利赴台灣拍攝《殺手》，因而跟台灣女粉絲Erin重遇，擦出愛火，並於上年結婚。原來兩人一直透過Facebook聯繫：「《殺手》係台灣出外景，當時約佢出嚟，一拍即合。之前都約過，但幾次都約唔到。」回想起當年與愛妻相識經過，林利笑說：「太太發夢都想不到自己會和我一齊，因為佢由細已經鍾意我，所以佢知嘅野、收藏嘅野仲多過我，佢到而家仲覺得發緊夢。以前佢細路仔時偶像得2個，一個係我，一個係王傑。」
（圖片：林利facebook）
（圖片：林利facebook）
兩人將會在16日慶祝結婚一周年，他指之前母親並沒有迫婚，反而自己一直想搵個伴。「自己都想有個伴，就算外表幾cool，其實內心都係空虛，始終要有個依靠，填滿內心，做任何事都事半功倍。」他表示疫情打亂很多計劃，並把夫妻分隔兩地多月。不過他就坦言異地戀並不痛苦。「每日都有訊息、視訊，甜言蜜語，又會喺facebook放閃。一周年會食餐飯兩個開心吓。」兩人亦有諗過「造人」，但就順其自然不強求﹐「因為始終年紀唔細，要再諗。我係希望兩個人可以開開心心，兩個人白頭到老都ok。」
（圖片：林利facebook）
踏入半百的感悟
53歲的林利經歷了很多，走到半百，嚮往家庭生活，人生觀亦改變了不少，感悟甚深。「我覺得我夠啦，要自私返啲，我係寸嘅，鍾意就鍾意，唔鍾意就唔鍾意，唔會理人點睇。好簡單，又無野心同慾望。」他又表示：「做我哋呢行係好靠天時地人和，加上時代變，能夠企得穩都算係咁。」他指《殺手》一劇不算是告別作，「可能一年一套，反而唱歌嘅時間多啲， 希望之後可以真係享受到家庭生活。」
（圖片：《晴報》黃紫維攝）
相關新聞：【TVB服務41年】李成昌為家人安份守己做綠葉 棄爭主角：「長遠地做實力演員」
撰文：林惠珊
責任編輯：楊安莉