【騙子很忙】上半年網上情緣/電話騙案急升 話你知點解情節咁低能都有人中招？

疫情之下，市民留在家中上網增多，連電騙及網上交友騙案亦愈來愈多。以警方公布電騙案數字為例，今年頭5個月個案共有531宗，當中有損失佔519宗，比去年同期199宗急增1.6倍，涉款更由去年同期4,553萬元（港元，下同），升到約1.85億元，而長者繼續係主要被騙對象，當中有255名受害人係60歲以上，合共損失約1億元。

大部分受害者都係網路交友時遭詐騙，受害者上網與騙徒（通常用假身份資訊，例如扮內地官員、某國高官、專業人士等），再利用各種藉口誘騙受害者將金錢入落指定戶口。可能一般人會覺得「邊有人咁蠢會信呢啲？」無錯，呢類騙局正正就係要睇落低能，如果太過合理對騙徒唔係好事，原因同經濟學有關。

首先，騙案大致可歸納為3種情況：
情況A：騙徒發出詐騙信息 → 對方回應 → 騙徒誘導 → 對方上當匯款（成功）
情況B：騙徒發出詐騙信息 → 對方回應 → 騙徒誘導 → 對方不上當（失敗）
情況C：騙徒發出詐騙信息 → 對方不上當（失敗）

電騙或網上情緣騙徒好多時要「扮鬼扮馬」，需要付出唔少人力物力同時間。而打電話或網上尋找目標去「發出詐騙信息」，係騙局嘅第一步，唔做唔得，呢個部分付出嘅時間同人力屬於一定要投放嘅「沉沒成本」（Sunk Cost），而當對方有所回應後，騙徒作「誘導」嘅時間同工夫就屬於「可變成本」（Prospective Cost）。呢類「漁翁撒網」式騙案，當然絕大部分都係以失敗收場。好喇，咁同樣係失敗，上述情況B同C，邊種對騙徒來講最慳水慳力呢？

{{hket:inline-image name="0713WLfeaturepage443.jpg"}}{{/hket:inline-image}}

▲打電話或網上尋找目標去「發出詐騙信息」，係騙局嘅第一步。

低能騙局用心良苦

睇到呢度大家一定知，「情況C」需要付出嘅成本係最少，相反「情況B」就係騙徒最唔希望出現嘅「高成本、零回報」結果。道理其實同「貸款電話」一樣，電話Sales最唔想遇到嗰啲傾好耐但最後話唔買，或者要返去問吓屋企人嘅人士，因為浪費好多時間，寧願一開始就Cut線好過。

所以，表面上低能嘅騙局，其實背後係高明嘅計算。騙徒為咗有效排除「最不利」嘅「情況B」，專登作個連「蠢蠢地」嘅人都知道係假，然後唔會回應（即由「情況B」變成「情況C」），只有「蠢到爆」嘅人先會信嘅低能故仔，咁就可以提高出現「情況A」嘅成功率同節省成本喇。

撰文：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/