近排TVB開始重播17年前嘅經典劇《九五至尊》，連埋今次已經係第4次播。
《九五至尊》講述雍正皇帝（江華飾演）被呂四娘（張可頤飾演）行刺，二人遇上水龍捲，結果從清朝穿越時空去到200年後。雍正喺陰差陽錯借用李大蝦身分喺現代香港安定落嚟，仲用智慧謀略輔佐三公子岑日禮（林韋辰飾演）喺家族企業上位。呂四娘一心想殺雍正，但後來對雍正日久生情，由恨變成愛。
(TVB電視截圖)
(TVB電視截圖)
(TVB電視截圖)
《九五至尊》首播時最高達至46點收視，劇集仲帶挈一班演員攞獎，當時男主角江華憑劇奪得「我最喜愛的電視男角色」，而秦沛則獲得「我最喜愛的實力非凡男藝員」，張可頤更首封視后兼同時獲「我最喜愛的電視女角色」。扮演皇帝嘅江華，同扮演俠女張可頤經常用書面語嚟溝通，同其他現代人對比之下非常有喜感。加上江華、張可頤、吳美珩、鄭敬基、譚小環、陳琪、羅莽等人都已經先後離巢，呢個陣容好難再見，難怪咁多人捱眼瞓都話要睇重播。
(TVB電視截圖)
(TVB電視截圖)
(TVB電視截圖)
(TVB電視截圖)
《九五至尊》食字食到正一正，不過原來本身嘅劇名非常直白，叫《朕到未來》。《朕到未來》令人聯想起1985年嘅美國經典科幻電影《回到未來》，同樣都係講穿越時空。雖然有人覺得原名膚淺，但有網民自行解讀「朕」同「浸」嘅發音相似，「浸」到未來可以呼應番劇中雍正同呂四娘浸住海水去現代嘅故事情節，一樣都好有意思咁話。
《九五至尊》仲造就咗一段美好姻緣，劇中陳琪同胡諾言飾演兩姊弟，成日鬥嘴，二人最終因劇撻著，愛情長跑7年後拉埋天窗，生咗兩女一仔。依家胡諾言主力留喺TVB拍劇，而陳琪就早喺17年離開TVB轉做網上直播同粉絲介紹產品，兩個不時都喺網上曬家庭樂，非常幸福。
(TVB電視截圖)
張可頤當年大爆江華好貪靚，指佢有私人化妝師跟入廠化妝，有指佢拍劇時會化兩個鐘妝。江華貪靚都唔係新鮮事，佢曾經同老婆麥潔文出席過一個活動，拒絕著上大會提供嘅服裝，麥潔文即為佢解畫：「佢自己件衫襯啲。」敬業樂業，對自己形象咁着緊，難怪都可以睇到觀眾咁入戲。
(TVB電視截圖)
撰文：張芷晴
責任編輯：黃蘊姿