尋晚「大美人」李嘉欣將自拍放上社交平台,留言指:「睡前跟大家說聲晚安。」素顏上陣嘅佢冇開美顏濾鏡,皮膚狀態依然相當好,好多網民讚佢好靚、有自信。另外亦有唔少網民對於佢嘅空氣瀏海有唔同評論:「這個瀏海不適合美人啊」、「為甚麼那麼奇怪」、「變化好大」、「佩服女神這種自黑精神」等,亦有人將佢認錯咗做葉璇、鄭裕玲:「不看網名都沒認出來」
(李嘉欣微博圖片)
(李嘉欣微博圖片;鄭裕玲instagram圖片)
唔少藝人都因為工作要轉髮型,不過有時某啲髮型就唔係個個都Carry,有啲剪完甚至唔認得佢係邊個添。
鍾嘉欣
鍾嘉欣一直留開黑色長頭髮,加埋佢甜美嘅美容同清純天真嘅氣質迷倒好多粉絲,仲被稱為「嘉欣BB」。後來,佢喺《老友狗狗》轉咗短髮look,成個人嘅吸睛度大減,仲被好多網民話佢同吳尊撞樣。當時同鍾嘉欣做對手戲嘅馬浚偉就取笑佢,話如果吳尊穿咗同一打扮,佢真係分唔清邊個打邊個。後來鍾嘉欣同吳尊終於因活動見面,佢自嘲同吳尊係失散兄妹,更公開自薦想同對方組合唱歌,卻被對方以「忙於拍戲」婉拒。
▼短髮
(TVB劇照;吳尊instagram圖片)
▼長髮
(鍾嘉欣instagram圖片)
迪麗熱巴
大陸女星迪麗熱巴出道以來都比較少留瀏海,有時會將成個頭電曲,好有大姐姐嘅成熟氣質。日前佢喺社交平台上載自拍,見佢剪咗齊蔭加將頭髮染成淺色,好似變咗另一個人咁,感覺可愛,當堂細咗幾歲。網民都留言表示好鍾意佢呢個新髮型︰「這個瀏海超適合你的!」、「再多來一點點!可太美了」、「也超可愛哇」等。
▼齊蔭
(迪麗熱巴instagram圖片)
▼冇瀏海
(迪麗熱巴微博圖片)
張曼玉
張曼玉一直都係留黑色中長髮,直到早前佢突然將成個頭剪短,染成橙啡色,形象煥然一新。部分網民指佢揀錯髮型,令瘦削嘅佢更形憔悴,仲話佢同黃夏蕙撞頭。亦有網民話佢唔需要理人哋講咩,勇於嘗試新造型,係一件好事咁話。
▼橙髮
(張宇微博圖片)
(電視截圖)
▼黑髮
(電視截圖)
吳亦凡
年青人嘅潮流指標、前韓國男團EXO成員吳亦凡好鍾意轉唔同髮型。早前佢喺社交平台上載新造型,卻被網民一致負評。當時佢留咗個中間分間嘅短髮,髮尾留長,成個頭濕𣲷𣲷,加埋成臉鬍渣,難怪被網民嘲笑:「得罪了造型師」、「太難看了」
▼濕髮
(吳亦凡instagram圖片)
▼乾髮
(吳亦凡instagram圖片)
木村拓哉
男神都會出事?鍾意留一頭飄逸嘅長頭嘅佢一向好有型,早前佢啱啱開通微博帳戶,著住西裝拍片同大家打招呼時,佢將頭髮全部梳咗去後面,結果被唔少網民話顯老、唔適合等。
▼All back頭
(木村拓哉微博圖片)
▼長髮
(木村拓哉微博圖片)
撰文:張芷晴
責任編輯:黃蘊姿