【殺手】林景程演活戇直男做殺手學徒 家人支持追夢做兼職幫補生計

唔少觀眾都好鍾意劇集《殺手》裡面嘅Dark Angel（龔嘉欣飾演），幾集唔見佢，大家都喺TVB fb專頁留言問佢去咗邊。琴晚佢終於出現，身邊多咗個徒弟。

劇情講述，小秉（林景程飾演）委託Dark Angel殺死搶佢女友嘅賤男兄弟 (姚亦澧飾演），點知喺Dark Angel準備將賤男推落樓小秉突然心軟叫停。Dark Angel之後收小秉做徒弟，佢開始進行特訓。

{{hket:inline-image name="Whats.jpeg"}}{{/hket:inline-image}}

(《殺手》電視截圖）

{{hket:inline-image name="Wh.jpeg"}}{{/hket:inline-image}}

(《殺手》電視截圖）

林景程喺劇中角色經常被人蝦，喜感十足，網民都大讚：「佢做戲幾掂，可惜一直唔多戲份」、「幾靚仔，演技又好，希望多啲見佢出現」等。林景程回覆本報訪問時就話：「網民嘅留言係寶藏嚟，佢地好有創意，我成日睇，可能會對第日有幫助㖭。」林景程大讚前輩黎耀祥同龔嘉欣：「嘉欣啲衫少布，好多時加唔到保護墊，打到周圍傷都要堅持繼續。有幾日祥哥唔舒服，我初初都唔知，roll機前仲不停搵佢對戲，佢又幾多次都照同你對，之後先知佢唔舒服。專業就係咩狀態下，都盡量唔會影響到工作。」

{{hket:inline-image name="WhatsA.jpeg"}}{{/hket:inline-image}}

(《殺手》電視截圖）

喺09年《超級巨星》出道，已經入行11年嘅林景程，多年嚟都係擔當配角為主，觀眾較深印象可能只有《三個女人一個「因」》嘅白保羅同埋《是咁的，法官閣下》嘅布仲謙。

林景程表示唔介意做配角:「我冇咩怨言，好好運了，咁多年以嚟都遇到好幾個有戲份又有發揮嘅角色。做配角都唔錯，最緊要唔係冇戲做，唔通畀個主角我做？搵鬼睇。我知我嘅位置喺邊，暫時唔追求位置以外嘅嘢。以前每次開工都尋找『今日可以學習到啲咩』，到依家，原來可以分享經驗畀其他新同事。」

{{hket:inline-image name="WhatsAp.jpeg"}}{{/hket:inline-image}}

(《超級巨星》電視截圖）

{{hket:inline-image name="WhatsApp.jpeg"}}{{/hket:inline-image}}

(《三個女人一個「因」》電視截圖）

{{hket:inline-image name="WhatsIm.jpeg"}}{{/hket:inline-image}}

(《是咁的，法官閣下》電視截圖）

林景程畢業於香港理工大學物理治療系，其後取得物理治療師專業資格，佢坦言做演員收入一定相對少啲，但佢唔介意：「收入相對少，但又想做戲，惟有喺唔使開劇嘅時候接多啲物理治療幫補下。」不過屋企人都好支持佢，佢都自覺好幸運：「屋企人以前成日叫我唔使畀咁多家用，甚至塞番畀我，依家轉咗過數，佢就塞唔到。佢哋知我鍾意演戲，初初可能當我玩幾年貪玩，而家佢哋都明白我好認真，我好幸運，屋企人十分諒解。」

撰文:張芷晴

責任編輯：黃蘊姿