【前亞視藝人】「翻版謝霆鋒」伍偉樂轉行揸巴士 養四子女「斷擔挑」感激妻共患難

現年38歲，有「翻版霆鋒」之稱嘅前亞洲電視藝人伍偉樂，日前（14日）喺社交平台分享自己嘅九巴職員證。

佢接受本報訪問，原來早喺4年前佢已經見過九巴招募車長嘅廣告，當時覺得人工唔錯，只係影低咗，冇理到。呢排佢受到新冠肺炎疫情影響，工作減少，令佢諗番起個廣告，決心轉行：「今年冇晒婚禮司儀、廣告、配音嘅工作邀請，係零呀。我曾經上網賣波鞋，賺好少錢。去九巴應徵，佢安排我試車、上堂、考牌，咁就做咗巴士司機。7月15日第一日返工，今日完咗第二日。冇乘客認得我，訓練嗰陣有導師認得我，同學仔唔認得，可能佢唔睇亞視啩。」

雖然只係做咗車長兩日，不過佢已經好大感受：「巴士司機每日做嘅嘢都一樣，但使命感重，有少少差錯已經足以致命，所以我都有諗清楚，做就認真做。今日有個媽咪送兩個女上車，嘩人哋媽咪肯將個女畀我車佢哋去目的地，嗰個感覺原來咁大。」

{{hket:inline-image name="Od8zFd8p-ScqNtDcVnD2JwRnio2qVka2G8S82RvEvNk.jpg"}}{{/hket:inline-image}}

(伍偉樂instagram圖片）

伍偉樂喺亞視訓練班畢業，主力擔任兒童節目主持，亦有演出劇集，效力咗亞視14年。回想以前拍劇嘅日子，伍偉樂話喜多過悲：「做藝人辛苦係諗嘢諗多咗，所以好多藝人都有精神病，我都會諗壞腦。但拍《我和殭屍有個約會III之永恆國度》、《香港奇案實錄》嗰時，好多人喺街認得我，依家媽咪級、牛高馬大都話睇過我，係窩心嘅。」離巢後，佢主要擔任婚禮司儀同商場活動主持，偶爾會參與廣告拍攝。

{{hket:inline-image name="Whm.jpeg"}}{{/hket:inline-image}}

(亞視電視截圖）

伍偉樂係香港明星足球隊其中一員，同譚詠麟、吳岱融、張兆輝、梁漢文等人係波友，佢同馬國明關係特別好。雖然伍偉樂得閒就會同班藝人約出嚟聚舊踢波，去過中國、澳門等地參加比賽，不過始終去唔返之前嘅身形，連佢都話自己由謝霆鋒變咗做「麥包」麥長青。

{{hket:inline-image name="Wh.jpeg"}}{{/hket:inline-image}}

(伍偉樂instagram圖片）

{{hket:inline-image name="Wh07.jpeg"}}{{/hket:inline-image}}

(伍偉樂instagram圖片）

伍偉樂同圈外女友喺2015年拉埋天窗，當日花費近百萬喺酒店筵開30席，請咗亞視同TVB藝人，如黃日華、羅家英等，佢接受過傳媒訪問話婚後要開始慳住使，有錢都留畀老婆使咁話。

▼結婚相

{{hket:inline-image name="W.jpeg"}}{{/hket:inline-image}}

(伍偉樂instagram圖片）

依家伍偉樂要養4個小朋友，生活使費多咗好多，所以佢太太一早為仔女開咗instagram帳戶同facebook專頁，偶爾接唔同產品嘅廣告邀請。伍偉樂嘅囝囝就曾經被廣告商睇中，有份喺尿片廣告出鏡㖭！佢都承認仔女表演慾好強，不過佢講到明唔打算培訓佢哋做星二代。

{{hket:inline-image name="23B3B211-CCF1-45A9-BBB8-E849CA37017F.jpeg"}}{{/hket:inline-image}}

(伍偉樂仔女instagram圖片）

{{hket:inline-image name="Whats16.jpeg"}}{{/hket:inline-image}}

(伍偉樂instagram圖片）

伍偉樂又指：「有時工人姐姐放假，忙到一頭暈，好似打仗，小朋友食飯、沖涼、抺地、氹佢哋瞓覺、換衫，踢晒腳，個人好似喪屍。老婆好攰，瘦晒，佢依家身體都唔係幾好，我都擔心佢。」

知道老婆一拖4好辛苦，佢喺社交平台公開講過甜言蜜語冧老婆：「我成世人做錯的事多，做對的事少，感激開心遇到你」。雖然老婆主力負起照顧仔女嘅責任，但身為廿四孝爸爸嘅佢工餘時間都會帶仔女周圍去，游水、行山、玩水、踩單車等，好盡責。

▼要湊4個真係唔易

{{hket:inline-image name="WhaPM.jpeg"}}{{/hket:inline-image}}

(伍偉樂instagram圖片）

{{hket:inline-image name="WhaM.jpeg"}}{{/hket:inline-image}}

(伍偉樂instagram圖片）

撰文：張芷晴

責任編輯：黃蘊姿