【聲明】港生活網站並無進行電話推廣活動

湯洛雯Po女神照疑曬男友視角 馬明︰最緊要大家鍾意啲相

發佈時間: 2020/07/17

不太活躍社交平台的馬國明上月初開啟IG戶口,其後爆出與湯洛雯(靚湯)的戀情,二人更在網上甜蜜互動。前晚靚湯連Po多張女神照,更穿上馬明最愛的唐老鴨圖案Tee,大方放閃,昨午馬明接受《晴報》訪問時避談是否由他揸機,只稱︰「最緊要大家鍾意啲相!」

46歲的馬明與33歲的靚湯自公開戀情後,二人至今依然甜到漏,經常互相到對方IG的發帖下留言,絕對是放閃界KOL。前晚及昨晨,靚湯連Po了三張靚靚女神照,共通點是穿上黑色唐老鴨Tee,而唐老鴨正正是馬明最愛的卡通人物。相中的靚湯如沐春風,似乎是「男友視角」拍出來的照片,未知是否由男友充當攝影師。

而馬明亦一如所料,在三張相片留言,其中昨晨靚湯發的第三張大頭靚相,她留言︰「When I look into your eyes……」馬明即用眼睛公仔及代表女友的獨角獸公仔貼圖回應,公開放閃冧爆女友,同時亦閃盲一眾網民。

無送畀女友唐老鴨Tee

馬明被問到與女友的網上互動成功閃盲網友,他笑言︰「其實無乜特別咋喎!」他又強調唐老鴨Tee並非自己送贈。提到女友穿上唐老鴨Tee似刻意投其所好,馬明直言︰「唔關事嘅,嗰隻鴨不嬲都好多人鍾意!(會否穿情侶裝?)我無呢款衫!」

問及照片是否二人拍拖時由他擔任攝影師,馬明則婉拒多言︰「無乜嘢,其他嘢都唔答啦!(好多人讚相片影得靚!)多謝大家,最緊要大家鍾意啲相!」至於粉絲就催促二人快快結婚;有人亦指小馬視角的靚湯最美麗。

撰文︰Steven

編輯︰黃寶恩

美術︰Simon

湯洛雯Po女神照疑曬男友視角 馬明︰最緊要大家鍾意啲相

靚湯坐在海邊堤岸回眸一笑電力十足,網民卻錯重點留意相中的唐老鴨Tee。(IG圖片)

湯洛雯Po女神照疑曬男友視角 馬明︰最緊要大家鍾意啲相

馬明與靚湯熱戀中,粉絲也希望二人有情人終成眷屬。(資料圖片)