群星告白 激親父母刻骨銘心的一次 黃宗澤︰偷5蚊買零食遭媽咪痛打

每位小朋友都有曳曳的時候，雖然大多是一些小事如貪玩和為食，但是家教甚嚴的父母，小則責罵幾句作教訓，重則痛打甚至送上一巴掌以示懲戒。李佳芯、周秀娜、黃宗澤和朱晨麗幾位藝人，都曾受過父母施以皮肉之苦，Ali更差點變成盲妹！

黃宗澤（Bosco）一直以來都是乖孩子，但小朋友都會有一時貪念，而他就因為貪吃，一次偷了媽媽五蚊買零食，結果被發現後，換來媽媽痛打收場！

Bosco很記得那次激嬲媽媽的經歷，他說︰「大約讀小學一、二年級，有一日因為貪吃，於是偷咗媽媽五蚊去屋企樓下間士多買零食，之後畀阿媽發現，佢梗係嬲到震啦，仲用毛巾綁住我啲手腳痛打我。（家教係咪好嚴？）都算係，阿媽一係唔打，一打就好勁揪，卒之我要跪地認錯佢先收手，自此之後唔敢再偷錢啦，嗰次簡直係挑戰阿媽底綫。」Bosco笑言小朋友的成長過程總要「衰一鑊」才學會乖，自己就是這一類！

女神李佳芯險變獨眼龍

李佳芯（Ali）自小是乖乖女，但在小學二、三年級時，她曾因為一個氫氣球而激嬲媽媽，還險些變成盲妹！事緣小時候的Ali很喜歡氫氣球，但當時它的售價很貴，父母不捨得買給她，所以每次見到時，都只好「睇了當擁有」。直到有天放學回家途中，Ali見到垃圾桶旁邊有個被人丟棄的氫氣球，她便興高采烈地將它帶回家，更開心地告訴剛放工回家的媽媽︰「媽咪，你睇下個氫氣球幾靚！唔使錢㗎！」

不過，當媽媽知道氫氣球的來歷後，即時叫Ali丟掉，Ali說︰「我真係好鍾意個氣球，食飯都攬住，媽媽再叫我丟咗佢，我就駁嘴︰『咁難得執番嚟，又唔係喺垃圾桶入面，又唔使你畀錢買，做乜要我丟咗佢啫！』到晚飯後媽媽執枱時，仍見到我攬住個氣球，佢突然間大發脾氣，拎起隻筷子大力掟過嚟，點知斷咗嗰截筷子飛向我的眼角，仲當場流血，媽媽好緊張，不停幫我止血，好彩只係掟中我的眼眉位，再過少少插到眼球可能就會盲咗！」

Ali從來都是聽教聽話的孩子，絕不會做出令父母不開心的事，但只因性格硬頸，那次就無意間激嬲媽媽，她直言覺得自己無錯，才會跟媽媽據理力爭，Ali笑言︰「估唔到因為個氫氣球差啲變盲，諗番真係好無辜。依家同媽媽講番件事，佢仲係覺得我唔啱，仲話『如果唔係你駁嘴就唔會咁啦。』哈哈！」

周秀娜︰男仔頭性格唔願着裙

在家鄉潮州長大的周秀娜（Chrissie），男仔頭性格的她，小時候最愛周圍走，家住幾層高樓房，屋與屋之間又有天台，頑皮的她經常在天台跳過對面天台，又會擒來擒去，旁人看到都戥她心驚膽顫，偏偏她就愈跳愈興奮，她說︰「試過好多次，媽咪追住我，由地下追到上天台，又由天台追返落地下，又搵到我躲在枱底，媽咪更出動雞毛掃！不過媽咪好少打我，通常會鬧，其實媽咪家教好嚴。」

Chrissie又說爸爸每日都早出晚歸工作，他很痛錫子女，每次都會充當子女的擋箭牌，「不過有次爸爸原本答應帶我去玩，點知後來因為要工作去不到，當時我望住佢坐車出去，就跟住架車追上去，我當然追唔到啦，於是坐喺馬路喊到飛起，真係好奀皮！」她又試過貪玩扭傷腳，所以幾日無返學。不過最搞笑的是，小時候不喜歡着裙的她，為了逃避着裙，竟然將雪糕倒落裙上，搞到全身污糟，還扭計叫媽媽給她着褲。

朱晨麗︰考試85分遭爸爸摑一巴

小時候在內地成長的朱晨麗（朱朱），讀書成績一向名列前茅，偏偏有次數學取得85分，想不到會激嬲爸爸，還送她一巴掌，令這位高材生牢記心中。

朱朱憶述那次激嬲爸爸的經歷時仍猶有餘悸，她說︰「讀小學時，有次數學考85分，拎試卷返屋企時，媽媽睇完無乜嘢，反而爸爸就好嬲，仲嬲到打我，嗰次係我人生第一次，（長大後）應該亦唔會再畀爸爸打。」朱朱表示讀書成績一向好好，但那次考試，鄰座的同學突然叫她抄自己的答案，結果朱朱就「失手」了，而她直言從未見過爸爸咁惡，「平時爸爸好少出聲，通常媽媽會話幾句，但嗰次爸爸好唔開心，仲摑咗我一巴，自從那次後我就學乖，仲年年拎獎學金。不過我讀書成績向來好平穩，突然分數跌咗，父母真係好失望同唔開心嘅。」

撰文：Pauline

編輯：黃寶恩、陳禮恒

美術：梁政敏