近日TVB於深夜重播經典劇集《九五至尊》，再次掀起捱夜煲劇潮。日前劇情講到李大蝦（江華飾演）入咗兆康建材公司做辦公室助理，見到岑家上下都想喺家族生意爭權。當中岑家二公子Hugo係由鄧浩光飾演，佢喺劇中係個同性戀者，但原來現實中佢已經有個女。已經退出娛樂圈16年嘅佢，究竟依家做緊咩？
(《九五至尊》電視截圖)
(《九五至尊》電視截圖)
鄧浩光出身於游泳世家，爸爸鄧乃鑄為前香港游泳隊領隊及教練，胞弟鄧國光係前亞運游泳代表隊成員。鄧浩光自己亦曾經係香港游泳運動員，曾奪過多面獎牌，喺7、80年曾代表香港參加亞運會，擅長游自由式和背泳，當年更曾打破香港紀錄，有「飛魚王子」之稱。後來佢引退加入娛樂圈，先後效力過香港電台、TVB、亞視，亦拍過唔少電影，作品包括《皇家警察實錄》、《再見艷陽天》、《流金歲月》、《戀愛自由式》、《大唐雙龍傳》等。
(《流金歲月》電影截圖)
{{hket:inline-image name="19.jpg"}}{{/hket:inline-image}}
(《戀愛自由式》電視截圖)
(《大唐雙龍傳》電視截圖)
久未喺螢光幕露面嘅鄧浩光，原來已經喺2002年結咗婚，2005年仲生埋囡囡Adrienne。家庭心重嘅佢喺04年毅然退出娛樂圈，轉投藥廠擔任銷售及市場部主管，希望可以多啲時間畀屋企。佢話轉咗行之後，唔止有收工時間，星期日仲可以同屋企人一齊，進行家庭活動，享受家庭樂，所以老婆都好支持佢呢個決定。
(藥廠instagram圖片)
鄧浩光話囡囡好識得撒嬌，所以好痛錫佢。佢仲話自己曾經因為囡囡一句無心說話，喺5個月內由最重176磅減到去146磅，變成肌肉男。當時佢曾經半裸大騷8嚿腹肌同人魚線，親身上陣幫公司拍攝廣告。鄧浩光事事以女為先，佢表示唔會逼囡囡游水，只會畀佢跟住自己嘅興趣去選擇學咩，真係一個廿四孝嘅好爸爸。
(藥廠instagram影片截圖)
鄧浩光近年不時現身公司做宣傳活動，年屆58歲嘅佢保養得好好，依然相當有型！
(藥廠instagram圖片)
(藥廠instagram圖片)
撰文：張芷晴
責任編輯：黃蘊姿