「亞視謝霆鋒」伍偉樂為養4個小朋友同老婆，日前決定轉行做巴士司機。佢曾經效力過亞視14年，唔少人都睇過佢主持嘅兒童節目，對於佢呢個決定，網民都一致讚好：「揸巴士唔失禮，有份工好好吖」、「為理想而追夢，為仔女而奮鬥！真英雄」等。
(相關文章：「翻版謝霆鋒」伍偉樂轉行揸巴士 養四子女「斷擔挑」感激妻共患難)
其實唔少藝人唔演戲之後，都會轉去另一個事業發展，好多都係搞生意做老闆，主力做入貨、拍片宣傳，有部分就做打工仔，唔怕捱，亦唔怕其他人嘅眼光。
蔡子健
蔡子健喺90年代加入TVB，係兒童節目《閃電傳真機》嘅主持，03年起淡出娛樂圈。蔡子健喺工餘時間進修，用咗多年終於完成香港公開大學國際商業工商管理學士課程，其後再讀埋碩士。依家佢已考獲特許財務策劃師，以及認可財務策劃師嘅資格。然而，佢表示藝人轉行到保險業未有為佢帶嚟優勢，更因為知名度而令佢幾困擾，有時客人問佢攝影機收埋喺邊，以為佢拍緊劇。
(TVB電視截圖)
(香港大學SPACE中國商業學院微博圖片)
鍾麗淇
鍾麗淇參加1995年多倫多華裔小姐競選而入行，拍過唔少劇集，05年毅然離巢投身瑜伽界。依家佢已經係好出名嘅瑜伽導師，雖然佢曾表示轉行令佢搵少好多錢，不過就開心咗好多，仲話瑜伽令佢打開咗自己嘅思想，相信自己值得被愛。
(TVB電視截圖)
(鍾麗淇facebook圖片)
向海嵐
向海嵐係1998年香港小姐冠軍，喺1999年代表香港參選國際華裔小姐得到季軍，其後成為00年代被力捧嘅花旦之一，代表作有《楊貴妃》、《無頭東宮》等。08年，佢曾轉行到上海擔任公關，佢當時表示做藝人要不斷等待機會，令佢感到厭倦同迷茫，所以希望到新地方重新開始。
(TVB電視截圖)
(向海嵐微博圖片)
江華
江華曾效力亞視、TVB，代表作有《西遊記》、《九五至尊》。04年，佢離開TVB，曾一度轉行做保險經紀。佢話唔想再做滿足唔到自己嘅工作，佢想追尋理想同樂趣，所以先會選擇退隱做保險。近年，佢不時同老婆麥潔文一齊上TVB慈善節目《明愛暖萬心》獻唱籌款，後又參與《流行經典50年》同公開演出。
(TVB電視截圖)
(TVB電視截圖)
陳思齊
陳思齊（原名：陳凱怡）喺00年參選港姐入行， 13年佢離開TVB到港視，但因港視牌照事件而令佢最後決定退出娛樂圈。及後，陳思齊進修音樂治療及香薰按摩課程，做咗身心靈治療師，佢話：「平時我都會同人講自己係骨妹，用香薰按摩幫客人減壓紓緩。」
(TVB電視截圖)
{{hket:inline-image name="16.jpg"}}{{/hket:inline-image}}
(陳思齊微博圖片)
撰文：張芷晴
責任編輯：黃蘊姿